Кампетэнтная, камунікабельная
Так характарызуюць наведвальнікі аптэкі №234 яе загадчыцу — фармацэўта Аляксандру Шаклюцкую.
Два гады таму ў аптэцы, размешчанай на рынку «Гарызонт», стала працаваць малады фармацэўт. Адразу новага спецыяліста наведвальнікі прынялі з недаверам.
— Да маёй вопытнай калегі выстройвалася чарга, а да мяне падыходзілі з насцярожанасцю, — успамінала Аляксандра Шаклюцкая. — Я ж старалася даходліва адказваць на ўсе пытанні кліентаў, цярпліва давала тлумачэнні па прымяненні таго ці іншага лякарства. А тыя, што стаялі ў чарзе, прыслухоўваліся і, напэўна, ацэньвалі мае глыбокія веды. З часам і ў мяне з’явіліся пастаянныя пакупнікі. Шмат іх бывае ў выхадныя дні, калі людзі прыязджаюць на рынак і заглядваюць у аптэку.
Аляксандра Шаклюцкая — пастаўчанка, выхоўвалася ў сям’і педагогаў, а марыла пра медыцыну. Паступіла ў Віцебскі дзяржаўны медыцынскі каледж на фармацэўта. Падчас вучобы ў выбранай прафесіі не расчаравалася: ёй усё было цікава. Па размеркаванні прыехала ў родны горад і стала студэнткай завочнага аддзялення факультэта сацыяльнай педагогікі і псіхалогіі Беларускага дзяржаўнага педагагічнага ўніверсітэта імя М. Танка.
— Сітуацыі здараюцца розныя, — гаварыла дзяўчына. — Наведвальнікі аптэкі — нярэдка людзі пажылыя, якія патрабуюць да сябе асаблівай увагі. Каб кожны пакідаў яе задаволеным, мала добра ведаць назвы лекаў і інструкцыі па іх прымяненні, трэба таксама быць добрым псіхолагам. Пры падборы неабходных прэпаратаў мы, фармацэўты, як і ўсе медработнікі, кіруемся прынцыпам « Не нашкодзь!»
Аляксандра прывяла выпадкі, з якімі даводзіцца сутыкацца. Найчасцей людзі пытаюцца, чым вылечыць тое ці іншае захворванне. Такіх наведвальнікаў малады фармацэўт пераконвае, што толькі доктар можа паставіць правільны дыягназ, назначыць адпаведнае лячэнне. Многія забываюць назву лякарства, называюць асобныя літары. І каб яго знайсці, прыходзіцца задаваць пытанні наконт сімптомаў хваробы, якога колеру была ўпакоўка. Некаторыя прыходзяць у аптэку, каб выгаварыцца, падзяліцца набалелым.
— За ўвесь час я ні разу не пашкадавала, што выбрала прафесію фармацэўта, — сцвярджала Аляксандра. — Мне падабаецца працаваць з людзьмі: аказваць ім дапамогу ў рамках сваёй кампетэнцыі, расказваць пра асаблівасці прыёму лякарстваў, падказваць, што лепш выбраць. Вельмі прыемна чуць словы ўдзячнасці за работу. А я ў сваю чаргу ўдзячная адміністрацыі цэнтральнай аптэкі №87 Пастаўскага раёна першай катэгорыі за тое, што даверыла мне такую адказную пасаду, за падтрымку і дапамогу на працягу двух гадоў працы.
Фармацэўту заўсёды трэба быць надзвычай уважлівым, бо ад гэтага залежыць здароўе людзей. Працаваць прыходзіцца з вялікай колькасцю лекавых прэпаратаў. І хоць сучасныя тэхналогіі дапамагаюць хутка адшукаць неабходную інфармацыю, у галаве трэба трымаць мноства назваў і дыягназаў. Аляксандра Шаклюцкая выдатна ведае асартымент тавараў. Калі неабходнага прэпарата няма ў наяўнасці, прапануе замену. Пакупнікоў прыцягвае як яе кампетэнтнасць, так і добразычлівасць, камунікабельнасць.
Тэкст і фота Анны Анішкевіч
