Чорна-белыя вандроўкі
Так назваў сваю выставу беларускі мастак-графіст, ураджэнец Брэсцкай вобласці Барыс Бокша. Яе адкрыццё адбылося ў выставачнай зале палаца Тызенгаўзаў. На ёй прадстаўлена больш за 37 аўтарскіх работ, прычым на 6 з іх намаляваны пейзажы Пастаўшчыны. Карціны выкананы з неверагоднай дакладнасцю. І гэта невыпадкова: жыццё аўтара цесна звязана з медыцынай. У 1995 годзе ён стварыў і ўзначаліў кампанію «Беломнимед», якая сёння з’яўляецца найбуйнейшым пастаўшчыком стаматалагічных матэрыялаў і абсталявання на айчынны рынак.
Барыс шмат падарожнічае па Беларусі, фатаграфуе асаблівыя для яго мясціны, а зімовымі вечарамі пераўвасабляе іх у графічныя карціны. Галоўны матыў яго творчасці — беларускі пейзаж. Асобнае месца займаюць работы з выявамі славутасцяў краіны — Косаўскага палаца, капліцы ў Варажбітах, Пружанскага палацыка.
Першая персанальная выстава мастака адбылася ў 2006 годзе ў Палацы мастацтваў у Мінску. Таксама ён выстаўляўся за мяжой — у Браціславе, Будапешце і Берліне.
Што прывяло Барыса Бокшу ў Паставы? «Пастаўшчына для мяне ўжо крыху родная. У вёсцы Роскаш маю сваё лецішча, дзе я і мае дзеці любім адпачываць, бываем тут часта, — дзяліўся ён на адкрыцці экспазіцыі. — Магу з упэўненасцю сказаць, што па прыгажосці, краявідах і ландшафце гэта адзін з найпрыгажэйшых куточкаў у краіне».
Тэкст і фота Крысціны Рубель
