У прыярытэце – работа з насельніцтвам
9—10 чэрвеня ў Мінску адбыўся рэспубліканскі семінар-нарада «Актуалізацыя метадаў і форм работы з насельніцтвам на мясцовым узроўні» з удзелам Прэзідэнта краіны.
На форум запрасілі больш за 700 прадстаўнікоў вертыкалі ўлады — парламентарыяў, кіраўнікоў дзяржаўных органаў, Адміністрацыю Прэзідэнта, членаў мясцовых адміністрацый і Саветаў дэпутатаў, экспертаў грамадскіх арганізацый і кіраўнікоў вядучых СМІ.
Актуальныя пытанні работы з насельніцтвам абмяркоўваліся ў шасці тэматычных секцыях: роля медыя, грамадскіх арганізацый, дэпутацкай супольнасці, звароты грамадзян, служба «Адно акно» і адзіная сістэма «115.бел». Як заўжды, дыялог атрымаўся адкрытым і змястоўным.
Асноўныя тэзісы выступлення Аляксандра Лукашэнкі:
- найгалоўнейшая задача пяцігодкі — ураўняць сацыяльныя стандарты для гарадской і сельскай мясцовасці;
- выбудоўваць эфектыўнае ўзаемадзеянне з грамадскімі актывістамі;
- узмацніць барацьбу з фэйкамі;
- раённыя газеты не павінны пераўтварацца ў трыбуну альбо дошку гонару старшыні райвыканкама;
- развіваць такую форму работы з насельніцтвам, як дыялогавыя пляцоўкі;
- прыцягваць грамадзян да абмеркавання важных дзяржаўных ініцыятыў;
- не народ павінен ісці да ўлады, а ўлада да народа.
Уражаннямі ад удзелу ў семінары-нарадзе падзяліўся адзін з прадстаўнікоў Пастаўшчыны — старшыння раённага Савета дэпутатаў Пётр Курто:
— Актуальнасць тэмы работы з насельніцтвам з года ў год толькі ўзрастае, бо гэта асноўнае ў дзейнасці дэпутацкага корпусу ўсіх узроўняў. Прынцыпы эфектыўнай зваротнай сувязі і адкрытага дыялогу ўлады з людзьмі павінны быць галоўнымі. Для гэтага неабходна яшчэ актыўней уключацца ў работу з насельніцтвам: выслухоўваць прапановы, заўвагі, скаргі. Людзі павінны быць пачуты, а праблемы — зняты. Калі дапамагчы немагчыма, то трэба адкрыта растлумачыць прычыну. Як паказвае практыка, многія пытанні можна, а галоўнае — неабходна, вырашаць на мясцовым узроўні. Многія праблемы мы ведаем і працуем над іх ухіленнем. Самыя папулярныя — работа гандлю і камунальнай гаспадаркі, рамонт дарог, ацяпленне дамоў з дапамогай электрычнасці. Каб больш дэталёва разабрацца ў пытаннях, якія хвалююць сельскіх жыхароў, плануем узнавіць у Пастаўскім раёне правядзенне дзён Саветаў. Яшчэ адна форма работы — дыялогавыя пляцоўкі з абмеркаваннем актуальных для насельніцтва пытанняў. Што да традыцыйных напрамкаў работы з насельніцтвам, то на першы план павінна выйсці інфармаванне праз раённыя СМІ. Людзі жадаюць ведаць, як улада вырашае іх праблемы, разумець, што іх чуюць.
