Лес для нашчадкаў
З 8 па 22 кастрычніка ў краіне праходзіла традыцыйная рэспубліканская акцыя «Адновім лясы разам». Сёлета яна прымеркавана да Года гістарычнай памяці. Далучыліся да акцыі і работнікі Пастаўскага лясгаса, валанцёры.
У суботу надвор’е выдалася сонечным і цёплым. А якая прыгажосць была ў лесе! Абапал дарогі на Касцяні працавалі работнікі адміністрацыі лясгаса і вучні 9 «А» класа СШ №1 разам з класным кіраўніком Ірынай Новік.
— На месцы планавай высечкі саджанцы сасны пасадзілі вясной, — расказваў намеснік дырэктара па ідэалагічнай рабоце лясгаса Аляксандр Іванькоў. — Але не ўсе яны гарачым летам прыжыліся. Таму цяпер дапаўняем пасадкі: на месцы загінулых дрэўцаў садзім новыя. Увогуле восенню ў лясгасе такую работу правялі амаль на 20 гектарах лесу. Найбольшы аб’ём выканалі работнікі лясніцтваў. Сёння ў акцыю ўключыліся адміністрацыя лясгаса і школьнікі.
Вучні працавалі з добрым настроем. Леснікі Пастаўскага лясніцтва навучылі іх карыстацца мячом Колесава, акуратна прызямляць саджанцы, прытоптваць каля іх каранёў глебу. Работа спорылася. Дзецям было дзіўна чуць, што гэты лес яны садзяць для сваіх будучых унукаў, бо працэс складаны і доўгі. Сеюць будучы лес звычайна ў красавіку. У цяпліцы разам з маладымі ўсходамі з’яўляецца пустазелле, таму патрабуецца праполка. У першае лета сеянцы больш нагадваюць хвошч. Сосенкі за год вырастаюць да 15 сантыметраў, елачкі — усяго 5-7. На пастаяннае месца росту высаджваюцца 2-3-гадовыя сеянцы.
Праз 5 гадоў на пасадках высякаюць параснікі бярозы, асіны, якія насейваюцца адвольна, яшчэ праз 5-10 гадоў працэдуру паўтараюць. Калі дрэвы дасягнуць 50-гадовага ўзросту, іх прарэджваюць — праводзяць высечкі догляду. Убачыць уласнаручна пасаджаны лес у максімальнай яго сіле ўдаецца мала каму, бо спеласць елкі і сасны наступае пасля 80 гадоў росту.
У суботу дапаўненне пасадак каля Касцянёў навучэнцы СШ №1 і адміністрацыя лясгаса правялі на плошчы 7,5 гектара.
— Удзячныя ўсім нераўнадушным пастаўчанам, асабліва школьнікам гарадскіх і сельскіх школ, якія былі актыўнымі не толькі ў пасадцы лесу, але і ў навядзенні парадку ў ім. У рамках акцый «Зробім лес чысцейшым за 50 дзён» і «Адновім лясы разам» агульнымі сіламі мы добраўпарадкавалі прыдарожныя палосы, месцы адпачынку, прыбралі несанкцыянаваныя звалкі, — рэзюмаваў Аляксандр Іванькоў.
Анна Анішкевіч