І сэрцам усе памаладзелі
Пахмурнае надвор’е ў чацвер наганяла сум. Але варта было наблізіцца да раённага Дома культуры, дзе ладзілася мерапрыемства з нагоды Дня пажылых людзей, як на душы пасвятлела. Першымі сустрэла ветэранаў малочнага завода. Яны разам з намеснікам дырэктара па ідэалагічнай рабоце Аляксандрай Гайлеўскай заліваліся звонкім смехам.
— Гады работы на заводзе — цудоўны час, — тлумачылі мне. — Мы часта збіраліся разам пасля змены, адзначалі розныя святы. З настальгіяй успамінаем той перыяд, калег. Адміністрацыя прадпрыемства і цяпер не абдзяляе нас увагай. Бязмежна за гэта ўдзячныя дырэктару Канстанціну Генрыхавічу Гайлеўскаму.
У фае таксама панавала святочная атмасфера. Ветэраны многіх арганізацый прыйшлі калектыўна. Адны разглядалі творчыя работы наведвальнікаў пастаўскага і лынтупскага дзённых аддзяленняў для грамадзян пажылога ўзросту ТЦСАН, другія мералі ціск і раіліся з медыкамі наконт свайго стану здароўя, трэція кансультаваліся ў спецыялістаў упраўлення па працы, занятасці і сацыяльнай абароне райвыканкама. Большасць былі рады сустрэчы і гутарылі паміж сабой.
Работнікі тэрытарыяльнага цэнтра сацыяльнага абслугоўвання насельніцтва шчыра віталі сацыяльных работнікаў і іх падапечных, з якімі яны прыйшлі на свята. Сярод іх — і ўдзельнікі конкурсу «Найлепшае падвор’е-2022». Канкурсантаў было 18, на свята прыехалі 6. Усе адзначаны Ганаровымі граматамі ТЦСАН і падарункамі.
Са святам прысутных павіншаваў намеснік старшыні райвыканкама Станіслаў Чымбург. Ён адзначыў, што кожны, хто знаходзіцца ў гэтай зале, унёс важкі ўклад у развіццё Пастаўшчыны: нехта будаваў дамы і дарогі, хтосьці вучыў дзяцей, лячыў людзей, працаваў вадзіцелем, прадаўцом…
— Дзень пажылых людзей — гэта нагода ў чарговы раз падзякаваць вам, шаноўныя, за шматгадовую добрасумленную працу, мудрасць, — гаварыў Станіслаў Уладзіміравіч. — І сёння вы актыўныя, энергічныя. А самае галоўнае — з’яўляецеся захавальнікамі найлепшых традыцый, сапраўднымі патрыётамі нашай краіны і прыкладам для маладога пакалення. Наш абавязак — забяспечыць вам спакойную старасць і сацыяльныя гарантыі. У гэтым кірунку шмат робіцца ў Беларусі і на Пастаўшчыне ў прыватнасці.
Шчырыя віншаванні прагучалі і ад старшыні раённай ветэранскай арганізацыі Ганны Літвіновіч.
Затым на сцэну выйшлі ўдзельнікі ўзорнай цыркавой студыі «Каскад», работнікі ТЦСАН і самі віноўнікі ўрачыстасці — вакальная група хору ветэранаў працы, наведвальнікі лынтупскага і пастаўскага аддзяленняў дзённага знаходжання для грамадзян пажылога ўзросту ТЦСАН. Яны запальна спявалі і танцавалі. Глядзела, слухала і думала: гэта сапраўды тыя людзі, чыю восень не пакінула вясна. Іх энергія перадавалася ў залу, і многія падпявалі. Ад гэтага святлелі твары, маладзелі сэрцы. Напэўна, многія гледачы пасля канцэрта стануць наведвальнікамі гэтых аддзяленняў, каб разам весела і творча праводзіць вольны час.
Анна Анішкевіч
