Выпрабаванне зімой
Сёлетні снежань не стамляецца выпрабоўваць жыхароў Пастаўшчыны. Пасля снегападу, які два тыдні назад ператварыў двары, вуліцы і дарогі раёна ў непраходныя і непраезныя, прыйшлі пацяпленне і галалёд. У такіх няпростых умовах надвор’я ў аўральным рэжыме працуюць не толькі работнікі дарожных і камунальнай арганізацый. На ўзмоцнены варыянт нясення службы пераведзены таксама супрацоўнікі аддзялення Дзяржаўтаінспекцыі РАУС.
З прыходам зімы дзяржаўтаінспектары кругласутачна ажыццяўляюць маніторынг усіх дарог горада і раёна і падказваюць арганізацыям, якія іх абслугоўваюць, дзе трэба падсыпаць або расчысціць, вывезці снег. Пры гэтым не забываюць кантраляваць выкананне правіл дарожнага руху ўсімі яго ўдзельнікамі. Пільна сочаць за тым, каб вадзіцелі вытрымлівалі бяспечную дыстанцыю з іншымі транспартнымі сродкамі, не парушалі ўстаноўленую скорасць руху і правілы абгону. Асаблівую ўвагу ўдзяляюць пешаходам, веласіпедыстам і кіроўцам гужавых павозак.
— Нямала дарог усё яшчэ замецена снегам, і па іх цяжка перамяшчацца, паколькі дарожныя і камунальная службы не цалкам расчысцілі тратуары і абочыны, — кажа начальнік аддзялення ДАІ РАУС Аляксандр Арэхаў. — Мы гэта разумеем і па магчымасці праяўляем лаяльнасць да пешаходаў: кагосьці папярэджваем, а не выпісваем штраф, камусьці даём святлоадбівальны элемент, каб вадзіцелі аўтамабіляў маглі яго бачыць у цёмны час сутак. Што да веласіпедыстаў, то ва ўмовах снегападу і галалёду рухацца на гэтых транспартных сродках катэгарычна забаронена. У першую чаргу каб пазбегнуць цяжкіх наступстваў для саміх кіроўцаў: яны могуць упасці і трапіць пад колы машын. Таму мы стараемся не дапусціць іх перамяшчэння па дарогах.
На жаль, не ўсе пешаходы і веласіпедысты жадаюць выконваць устаноўленыя правілы, ім няпроста прывіць культуру нашэння флікераў. За 11 месяцаў з пачатку года пастаўскімі дзяржаўтаінспектарамі складзена 677 адміністрацыйных пратаколаў у адносінах да пешаходаў і 470 — у адносінах да веласіпедыстаў. Пры гэтым 67 чалавек знаходзіліся ў стане алкагольнага ап’янення.
Што да дарожнай абстаноўкі ў цэлым, то за названы перыяд часу ў раёне адбылося 10 дарожна-транспартных здарэнняў, у якіх пацярпелі людзі, 1 чалавек загінуў. Таксама сёлета здзейснена вялікая колькасць ДТЗ з удзелам пешаходаў. Прычынай большасці з іх стаў няпропуск апошніх вадзіцелямі на нерэгулюемых пешаходных пераходах. У сувязі з гэтым супрацоўнікі АДАІ не выпускаюць гэтыя ўчасткі дарог з поля свайго зроку, праводзяць прафілактычную работу з абедзвюма катэгорыямі ўдзельнікаў дарожнага руху. Пешаходам тлумачаць, што выходзіць на пераход можна толькі пераканаўшыся ў тым, што вадзіцелі іх бачаць і гатовыя ўступіць дарогу. Ні ў якім выпадку нельга нечакана выскокваць на яе, бо ў зімовых умовах машыны не змогуць экстранна спыніцца. А ад вадзіцеляў патрабуюць, каб пры пад’ездзе да пераходу яны зніжалі скорасць руху, калі паблізу знаходзіцца пешаход.
Актуальнай застаецца і праблема кіравання аўтатранспартам у стане алкагольнага ап’янення. З пачатку года на дарогах Пастаўшчыны выяўлена 87 нецвярозых вадзіцеляў. Нягледзячы на тое, што законам прадугледжана суровае пакаранне за такое правапарушэнне — штраф да 6 400 рублёў і пазбаўленне вадзіцельскіх правоў на тэрмін да 5 гадоў, — п’яных за рулём менш не становіцца. Нярэдка з імі адбываюцца розныя дарожна-транспартныя здарэнні. Таму дзяржаўтаінспектары заклікаюць усіх жыхароў раёна не даваць сваім родным і знаёмым садзіцца за руль пад градусам: адгаворваць, забіраць ключы ад машын. А калі не ўдаецца гэта зрабіць, неадкладна тэлефанаваць у РАУС па нумары 102. Так вы захаваеце жыццё не толькі блізкаму чалавеку, але і іншым людзям.
Вяртаючыся да дарожнай бяспекі ў зімні перыяд, Аляксандр Арэхаў адзначыў, што з наступленнем маразоў і выпадзеннем снегу ўсе аўтамабілі ДАІ дадаткова ўкамплектаваны буксіровачнымі тросамі і прыкурвацелямі для акумулятара, у кожнага экіпажа ДПС пры сабе ёсць тэрмас з гарачым чаем і коўдра на выпадак, калі якая-небудзь машына засела ці заглохла на дарозе і патрабуецца дапамога. Нярэдка дзяржаўтаінспектары падключаюць тэхніку дарожных арганізацый. Дапамагаюць і вадзіцелі, якія кіруюць транспартнымі сродкамі павышанай праходнасці: яны ніколі не праедуць міма.
— Хоць снегапад і галалёд даставілі ўсім нямала праблем, сур’ёзных дарожна-транспартных здарэнняў з прыходам зімы ў раёне, на шчасце, не адбылося. Вадзіцелі сталі больш акуратныя і ўважлівыя на дарогах. Спадзяюся, так будзе і ў далейшым, — заключыў Аляксандр Віктаравіч.
Алена Шапавалава
