Разам праз мастацтва — пад такой назвай у Варапаеўскім гарпасялковым Доме культуры прайшла дыялогавая пляцоўка. Яе пры падтрымцы Міністэрства культуры Беларусі арганізавалі артысты Маладзёжнага тэатра эстрады.
У творчай сустрэчы ўдзельнічалі папулярная арт-група «Беларусы», вядомыя беларускія спявачкі Алена Грышанава і Гюнэш, саліст Маладзёжнага тэатра эстрады Дзмітрый Сяргееў.
— Марафон стартаваў яшчэ вясной, — гаварыла мадэратар праекта Кацярына Шумская. — Артысты беларускай эстрады ўжо пабывалі ў многіх гарадах і аграгарадках. Сёння завіталі ў Варапаева. Наша мэта — расказаць юным гледачам пра магчымасці, якія ёсць у Беларусі для тых, хто хоча звязаць сваё жыццё з мастацтвам. Сталічныя госці раскажуць пра свой шлях у прафесію, прадэманструюць узровень свайго выканальніцкага майстэрства, падзеляцца творчымі дасягненнямі. Фармат мерапрыемства адкрыты і свабодны, кожны можа задаць артыстам пытанні.
Адкрылі сустрэчу «Беларусы» ў складзе лірычнага тэнара Віталія Зюскінда, баса Ігара Рацівых, драматычнага тэнара Андрэя Коласава і тэнара-альтына Антона Зараўняднага. Кіраўнік групы Валерый Шмат прыехаць не змог. Вельмі цікава было паслухаць кожнага ўдзельніка. Мужчынская вакальная эстрадная група створана ў лютым 2005 года. Адметнай яе рысай з’яўляецца спалучэнне акадэмічнага і эстраднага вакалу, частая змена рэгістраў і тэмбраў. Артысты расказвалі пра адрозненні працы ў якасці саліста і ў групе, калі даводзіцца спяваць на пяць галасоў, пастаянна прыслухоўвацца адно да другога, мець пачуццё локця.
Рэпертуар арт-групы ўключае ў сябе сусветную класіку, аўтарскія творы, рэтра, поп-музыку, рок, нумары з опер і мюзіклаў, народныя песні. Вялікую ўвагу артысты ўдзяляюць захаванню беларускай культуры. Разам з тым Валерый Шмат часта звяртаецца да сусветнай музычнай спадчыны. У 2010 годзе гледачам была прапанавана праграма «Сусветная музыка галасамі «Беларусаў», у якой многія хіты прагучалі адначасова на мове арыгінала і на беларускай мове. Калектыў мае мноства розных грамат. А яго кіраўнік Валерый Шмат узнагароджаны медалём Францыска Скарыны і нагрудным знакам Міністэрства культуры Рэспублікі Беларусь «За ўклад у развіццё культуры Беларусі». Выступленне папулярнай групы варапаеўцы сустрэлі гучнымі апладысментамі.
Затым сцэна перайшла ў распараджэнне Алены Грышанавай, Гюнэш і Дзмітрыя Сяргеева.
— Я пачынала выступаць разам з сястрой-блізняткай, — успамінала Алена Грышанава. — У нас быў дуэт «Авацыя». На той час я мела ўжо мужа і дачушку, а ў Наташы сям’я толькі складвалася. Яна адмовілася ад кар’еры артысткі, а я паехала ў Кіеў, дзе пачалося маё станаўленне. Затым вярнулася ў Мінск, бо вельмі люблю Беларусь, нашага гледача, і мне тут вельмі добра.
Бацькі Гюнэш — азербайджанцы. Больш за 40 гадоў таму яны пераехалі ў Баранавічы, дзе і нарадзілася будучая спявачка. Яе імя ў перакладзе з азербайджанскай мовы азначае «сонечная». Беларуска з экзатычнай знешнасцю 10 гадоў таму выканала песню «Дочь Востока» і канчаткова замацавала за сабой гэты вобраз. Гюнэш удзельнічала ў 47 міжнародных конкурсах і на кожным перамагала. Прысутным яна параіла ставіць перад сабой мэту і настойліва да яе ісці. А ў нашай краіне таленавітая моладзь мае вялікую падтрымку з боку дзяржавы.
Гэта пацвердзіў і заслужаны артыст Беларусі Дзмітрый Сяргееў. Ураджэнец Маладзечна з дзяцінства марыў іграць на барабанах, але ў музычнай школе яму прапанавалі віяланчэль. З ёй не разлучаўся да 23 гадоў. Скончыў Маладзечанскае музычнае вучылішча імя Агінскага, затым — Беларускі дзяржаўны ўніверсітэт культуры і мастацтва. Вырашыў паспрабаваць саліраваць. Удзельнічаў у шматлікіх конкурсах і станавіўся іх лаўрэатам. З 2004 года працуе ў Маладзёжным тэатры эстрады як саліст-вакаліст. Талент Дзмітрыя высока ацаніў Прэзідэнт краіны Аляксандр Лукашэнка і ўдастоіў яго звання заслужанага артыста Беларусі, а таксама ўзнагародзіў медалём Францыска Скарыны.
Пасля шчырага дыялогу сталічныя госці парадавалі гледачоў канцэртнай праграмай. Публіка ацаніла творчыя нумары бурнымі апладысментамі. У Варапаеве яна была вельмі актыўнай, задавала артыстам шматлікія пытанні. А колькі ахвотных было сфатаграфавацца з імі!
— Жыхары аграгарадкоў не заўсёды могуць паехаць у Мінск на канцэрт артыстаў беларускай эстрады, — гаварыла старшыня Варапаеўскага сельскага Савета Іна Касарэўская. — І тое, што Варапаева трапіла ў лік 28 населеных пунктаў, у якіх прайшоў або яшчэ пройдзе марафон, для нас унікальная магчымасць бліжэй пазнаёміцца са славутымі спевакамі, якія дасягнулі поспеху і не перастаюць працаваць і развівацца на карысць краіны. Дзякуючы адкрытаму фармату дыялогавай пляцоўкі моладзь змагла задаць артыстам пытанні, пачуць іх расказы пра жыццё, сакрэты поспеху. Гэта добры прыклад для маладога пакалення.
— Станоўчыя эмоцыі перапаўняюць, — падключыліся да размовы навучэнцы Варапаеўскай дзіцячай школы мастацтваў імя Іосіфа Сушко. — Артысты прадэманстравалі сапраўдны прафесіяналізм. Яны такія адкрытыя і шчырыя! Фатаграфаваліся з кожным, хто хацеў мець фота на памяць, раздавалі аўтографы. Іх расказы пра сябе надалі нам упэўненасці на шляху да дасягнення пастаўленай мэты.
Анна Анішкевіч
