Пастановай Савета Міністраў ад 28 снежня 2023 года № 961 зацверджана Канцэпцыя развіцця нацыянальнай культурнай прасторы ва ўсіх сферах жыцця грамадства на 2024—2026 гады. Сваім меркаваннем пра важнасць і своечасовасць прынятага дакумента падзялілася начальнік аддзела культуры райвыканкама Ірына Лойка:
— Нацыянальная культура — важная і неад’емная частка любой краіны. Зацверджаная канцэпцыя ў Год якасці носіць сімвалічны характар. Найперш таму, што якасная культурная прадукцыя натхняе і матывуе людзей, выклікае эмоцыі, наладжвае зносіны, а таксама нараджае новыя ідэі.
Згодна з ёй, развіццё нацыянальнай культурнай прасторы накіравана на захаванне гістарычнай памяці беларускага народа, яго самабытнасці, рэалізацыю інтэлектуальнага і творчага патэнцыялу нацыі.
Адным з найважнейшых напрамкаў рэалізацыі дакумента лічу захаванне і абарону культурных каштоўнасцей краіны: нацыянальных традыцый, звычаяў, мовы і мастацтва. Дзейнічаць у гэтым напрамку і зрабіць яго прыярытэтным — грамадзянскі абавязак кожнага з нас. Толькі ў такім выпадку мы будзем мець магчымасць перадаць нашчадкам ідэнтычнасць беларускай нацыі. Адзначу, што работнікі культурнай сферы Пастаўшчыны ў гэтым плане заўсёды трымаюць руку на пульсе: яны даюць магчымасць грамадству не толькі пазнаёміцца з нацыянальнай спадчынай роднага краю, але і праявіць сябе праз мастацтва і прыняць удзел у культурных мерапрыемствах.
Канцэпцыяй вызначаны таксама механізмы і для развіцця культуры побыту, грамадскіх адносін і вытворчасці, а таксама для культурнага развіцця рэгіёнаў. Хачу заўважыць, што ў плане апошняга Пастаўшчыне ёсць чым ганарыцца: штогод, у чэрвені, да нас з’язджаюцца шматлікія аматары фальклору і народнай музыкі не толькі з Беларусі, але і з краін блізкага і далёкага замежжа. Усіх збірае Міжнародны фестываль народнай музыкі «Звіняць цымбалы і гармонік». За апошнія больш чым 30 гадоў мы віталі гасцей з Расіі, Латвіі, Літвы, Польшчы, Венесуэлы, Эстоніі, Грузіі, Кітая і нават Індыі. Нягледзячы на тое, што ў апошні час розныя абставіны перашкаджаюць нашай краіне наладжваць культурныя адносіны з замежжам, у пастаўчан усё ж засталася магчымасць абменьвацца музычным вопытам. Маштабнае мерапрыемства прываблівае ў райцэнтр турыстаў не толькі народнай музыкай, але і выставамі-продажамі творчых работ беларускіх майстроў, канцэртамі класічнай арганнай музыкі, відовішчнымі тэатральнымі пастаноўкамі, канцэртамі беларускіх выканаўцаў і маляўнічым феерверкам. Гэта падзея садзейнічае культурнаму развіццю нашага рэгіёна. Трэба адзначыць, што пастаўчанам заўсёды ёсць што паказаць і чым здзівіць гасцей фестывалю.
У заключэнне хачу адзначыць, што краіны, багатыя на нацыянальную культурную спадчыну, прыцягваюць мноства наведвальнікаў з усяго свету. Якасныя выставы, святы, якія дэманструюць глыбіню нацыянальнага духу, унікальныя рамёствы, мясцовая кухня і многае іншае заўсёды выклікаюць не толькі павагу і зацікаўленасць, але і становяцца прывабнымі турыстычнымі аб’ектамі, якія ў сваю чаргу садзейнічаюць эканамічнаму развіццю краіны.
Запісала Крысціна Рубель
