Ленінская «пераапранаецца». Гэта цэнтральная і самая доўгая — працягласцю 4 кіламетры — вуліца гарпасёлка Варапаева. Зараз яна «апранаецца» ў новае асфальтавае пакрыццё. Работы выконвае Пастаўскае ДРБУ-132 і плануе завяршыць іх у наступным месяцы.
— Яны пачаліся ад чыгуначнага пераезда ля дыстанцыі пуці і вядуцца да другога пераезда непадалёк вёскі Кейзікі, — расказвала старшыня Варапаеўскага сельскага Савета Іна Касарэўская. — Потым працягнуцца ў бок мікрараёна былога завода жалезабетонных вырабаў. Будзе пакладзены асфальт і на ўчастку вуліцы ад царквы да мяжы гарпасёлка ў напрамку Мышак. Таксама запланавана асфальтаванне вуліц Кааператыўнай, Пралетарскай, Гагарына, а на апошняй, якая вядзе да школы, будзе зроблены яшчэ і тратуар.
З мэтай добраўпарадкавання ў пасёлку гаспадарчым спосабам спілавалі 5 аварыйных дрэў, за сродкі УП ЖКГ — 13. Высаджваюць дэкаратыўныя кусты і маладыя дрэўцы. Школьнікі пасадзілі нават 15 яблынек.
Радуюцца варапаеўцы і рамонту будынкаў. У мясцовым Доме культуры заменены дах і частка падлогі, перафарбаваны сцены, у холе пакладзена новая плітка. Абнаўляюцца ўстановы адукацыі. У сярэдняй школе і дзіцячым садку ўставілі шклопакеты, у садку — яшчэ і новыя дзверы. Адным словам, пасёлак прыгажэе.
Фаіна Касаткіна
Фота даслала Іна Касарэўская
