Кожны з бацькоў марыць, каб іх дзіця расло шчаслівым і паспяховым. Такую магчымасць ужо чацвёрты год дорыць фестываль сатворчасці дзяцей і дарослых «Родныя людзі». Сёлета асаблівае захапленне журы выклікала сумесная творчасць 5-гадовага выхаванца пастаўскага дзіцячага сада №5 Андрэя Нікалаева і яго маці Вольгі: іх таленавіты тандэм быў заслужана адзначаны найвышэйшай узнагародай у намінацыі «Чароўная шкатулка».
Фестываль праходзіў у завочнай форме з 5 па 22 мая і сабраў звыш 1 300 маленькіх удзельнікаў з розных куткоў краіны. Дзеці разам з бацькамі або педагогамі дэманстравалі таленты ў розных відах мастацтва: жывапісе, дэкаратыўна-прыкладным мастацтве, танцах, вакале, а таксама ў спорце. Арганізатар фестывалю — факультэт дашкольнай адукацыі Беларускага дзяржаўнага педагагічнага ўніверсітэта.
Сям’я Нікалаевых прадставіла аўтарскае пано пад назвай «Лялечны карагод», якое сімвалізуе падарожжа міфалагічных лялек праз поры года. Пано ўяўляе сабой своеасаблівы шэдэўр народнай творчасці, які адлюстроўвае старажытныя вераванні і звычаі беларускага народа.
— Даўно хацела стварыць такую работу, вось толькі нагоды не было, — расказвала Вольга Нікалаева. — Калі выхавальнік Андрэйкі Марына Курцэвіч запрасіла нас прыняць удзел у конкурсе, я зразумела, што надышоў зручны момант ажыццявіць сваю ідэю.
Вольга працуе педагогам дадатковай адукацыі ў раённым цэнтры дзяцей і моладзі, кіруе фальклорным калектывам «Журавінка». Яе напрамак звязаны з народнымі абрадамі і стварэннем традыцыйных народных лялек. Жанчына расказала, што на выраб пано пайшло тры дні. Спачатку маці старанна падрыхтавалася: знайшла патрэбную тканіну, зрабіла аснову, нарыхтоўкі для лялек. Для пано выкарыстала тэкстыль, ніткі, тасьму, стужкі, салому, галінкі. Затым разам з сынам яны па-майстэрску вырабілі дэталі, якія потым прымацавалі да асновы, вязалі вузельчыкі і выкладвалі ў выглядзе кола. Дзякуючы стараннай падрыхтоўцы работу выканалі адносна хутка і якасна. Увесь працэс знялі на камеру і адправілі відэа на конкурс.
— Нашы продкі верылі, што створаныя імі лялькі прыносяць шчасце, абараняюць ад бед і прыцягваюць поспех, — тлумачыла Вольга. — Такія цацкі ўпрыгожвалі дом, захоўваліся ў святых месцах і выкарыстоўваліся ў важных сямейных абрадах. Лялькі былі сімвалам дабрабыту і хатняга цяпла. Кожная дэталь нашага пано мае глыбокі сэнс: кветкі, арнаменты, знакі пор года перадаюць народную філасофію жыцця і прыгажосць прыроды.
Вольга прызнаецца: найвышэйшая ўзнагарода стала для іх з сынам нечаканасцю, бо канкурэнцыя была высокай, работы ўдзельнікаў — арыгінальнымі.
— Пра перамогу даведалася выпадкова, калі ўбачыла прозвішча і імя сына ў спісе пераможцаў на сайце ўніверсітэта, — успамінала суразмоўца. — Прыемна, што наша работа прызнана адной з найлепшых. (У намінацыі «Чароўная шкатулка» Гран-пры атрымалі пяць работ, адна з іх — наша.) Да таго ж удзел у фестывалі дазволіў і сыну раскрыць свае творчыя здольнасці, адчуць радасць поспеху. Гэтым я задаволеная асабліва.
Шчыра віншуем таленавітых маму і сына і жадаем ім далейшых поспехаў у творчасці!
Кристина Рубель
