30 сацыяльных работнікаў тэрытарыяльнага цэнтра сацыяльнага абслугоўвання насельніцтва атрымалі новыя веласіпеды, а ўсе — спецадзенне.
— Абнаўленне стала магчымым дзякуючы клопату раённай улады, — расказвала загадчык аддзялення сацыяльнай дапамогі дома ТЦСАН Іна Вырвіч. — Двухколавы транспарт вельмі неабходны ў паўсядзённых клопатах сацыяльных работнікаў. Асабліва ў сельскай мясцоваці, дзе не курсіруюць аўтобусы, а адлегласць паміж некаторымі вёскамі да дзясятка кіламетраў. Веласіпеды абсталяваны ёмістымі карзінамі. І цяпер сацыяльным работнікам не трэба будзе насіць сумкі з прадуктамі і іншымі неабходнымі падапечным таварамі ў руках. Гэта аблегчыць працу, сэканоміць час і дазволіць павысіць якасць абслугоўвання.
На Пастаўшчыне больш за 1 000 непрацаздольных пажылых адзінокіх і адзінока пражываючых грамадзян знаходзяцца на абслугоўванні ў ТЦСАН. Да іх спяшаюцца 110 сацыяльных работнікаў. Складана нават уявіць, колькі разоў за дзень ім прыходзіцца прыбіраць, хадзіць па пакупкі і лекі, прыносіць ваду і дровы, гатаваць, слухаць аповеды пра мінулае, нараканні на дрэннае здароўе і адзіноту. І трэба знаходзіць словы, каб падбадзёрыць кожнага, дадаць яму аптымізму.
Каб сацыяльным работнікам было камфортна ў любое надвор’е, іх забяспечылі яркімі халатамі, цёплымі курткамі, гумовымі ўцепленымі ботамі, тапачкамі, умяшчальнымі сумкамі для пакупак, кейсамі здароўя.
Анна Анішкевіч
Фота даслала Іна Вырвіч
