Мацярынства — найвышэйшае шчасце. На здымку — тры шчаслівыя жанчыны з адной сям’і з райцэнтра — адкрытыя, прыгожыя, падобныя адна на другую. І хоць у іх рознае жыллё, гэта ніколькі не перашкаджае еднасці.
Сэрца сям’і — маці, бабуля і прабабуля Марыя Лысёнак.
— Чалавек не можа вырасці шчаслівым, калі ў дзяцінстве не акружаны мацярынскай і бацькоўскай любоўю і клопатам, — гаворыць яе дачка Марына Нагановіч, у якой двое дарослых дзяцей і пяцёра ўнукаў. — Наша мама вырасла ў вясковай сям’і, дзе выхоўвалася 11 дзяцей і ніхто не быў абдзелены клопатам. Для мяне і брата Сашы, нашых дзяцей і ўнукаў мама — святы чалавек. Яе цеплыні і любові хапае на ўсіх. Заўсёды на пазітыве, заўсёды гатовая прыйсці на дапамогу, нават калі сама недамагае.
Марыі Сяргееўне 72 гады, а звярніце ўвагу, як молада і прыгожа выглядае! Нібыта пяшчотны агеньчык шчырасці, дабрыні і любові асвятляе ўсю яе істоту.
— У 42 гады я аўдавела, — гаварыла жанчына. — Усё жыццё прысвячаю дачцэ і сыну, іх сем’ям. Лічу, што ў мяне не двое, а чацвёра дзяцей, бо роднымі сталі нявестка Марына і зяць Віктар. Няма ні дня, калі б я не была на сувязі з дзецьмі і ўнукамі. А як радасна за чатырох унукаў і пяцярых праўнукаў! У гэтым месяцы чакаем прыбаўлення: дзве ўнучкі павінны нарадзіць.
І вось адна з іх — Дзіяна Камянецкая. У яе вобліку — ціхая, загадкавая прыгажосць цяжарнасці. Маладая жанчына чакае трэцяе дзіця, а яе шасцігадовая дачушка Эрыка і дзевяцігадовы сын Роберт — сястрычку, якой ужо і імя выбралі — Адэліна.
Тры жанчыны, тры маці, тры самыя родныя чалавекі. Нягледзячы на розніцу ва ўзросце, яны яшчэ і сяброўкі, чаму варта толькі пазайздросціць. Але самае галоўнае, што кожная высока нясе сваё мацярынскае прызначэнне.
Фаіна Касаткіна
Фота Наталлі Налей
