Удзельнікі вакальнай групы «Актыўнае даўгалецце» лынтупскага аддзялення для грамадзян пажылога ўзросту ТЦСАН паспяхова выступілі на VI міжрэгіянальным фестывалі творчасці пажылых людзей «Таленты залатога пакалення».
— Фестываль традыцыйна праходзіў у Докшыцах, — расказвала загадчыца аддзялення Таццяна Валуевіч. — Акрамя наведвальнікаў мясцовага ТЦСАН, удзельнічалі мы, а таксама прадстаўнікі Глыбоцкага, Міёрскага і Браслаўскага раёнаў. Падрыхтаваная нашай вакальнай групай «Актыўнае даўгалецце» 30-хвілінная літаратурна-музычная кампазіцыя «Скрозь гады і лёсы» спадабалася ўсім прысутным. Яна прысвячалася 80-годдзю Вялікай Перамогі і Дню народнага адзінства. І арганізатараў, і гледачоў выступоўцы падкупілі сваёй харызмай і станоўчай энергетыкай.
Пастаўшчыну прадстаўлялі Вольга Мажута, Станіслава Лукшэне, Галіна Чычаль, Вольга Махрова, Валянціна Сасноўская, Лілія Мініковіч, Она Ламага, Раіса Марцінкевіч, Алена Мудрая. Яны спявалі а капэла, танцавалі вальс франтавых медсясцёр. Некалькі песень выканала Вольга Мажута. Валянціна Сасноўская пранікнёна прачытала верш. Шмат апладысментаў было пасля паказу гумарыстычнай сцэнкі.
— На фестываль у чарговы раз сабраліся тыя, хто ўмее насычана праводзіць час на пенсіі, зараджае сваёй энергіяй іншых, — дзяліліся лынтупчанкі. — Нам было вельмі прыемна на гасціннай докшыцкай зямлі акунуцца ў атмасферу музыкі, песень, творчых зносін і паказаць свае здольнасці, а таксама сарваць гучныя апладысменты за сваё выступленне, атрымаць узнагароды і сувеніры ад арганізатараў фестывалю.
Анна Анішкевіч
Фота даслала Таццяна Валуевіч
