Па даных Сусветнай арганізацыі аховы здароўя, галоўнай прычынай высокай смяротнасці і інваліднасці насельніцтва планеты з’яўляюцца неінфекцыйныя захворванні — у асноўным хваробы сістэмы кровазвароту, новаўтварэнні (анкалогія), цукровы дыябет і хранічныя хваробы лёгкіх. З мэтай недапушчэння іх развіцця і ранняга выяўлення ў большасці краін свету, у тым ліку ў Беларусі, праводзіцца дыспансерызацыя насельніцтва.
У нашай рэспубліцы дыспансерызацыю праходзяць усе — ад малых да старых. Раней яна праводзілася крыху інакш, чым цяпер. З мінулага года ў дачыненні да дарослых беларусаў дзейнічае пастанова Міністэрства аховы здароўя №173, у адпаведнасці з якой вызначаны дзве групы дыспансернага назірання — насельніцтва ад 18 да 39 гадоў і асобы ад 40 гадоў і старэйшыя. У залежнасці ад узросту ўстаноўлена перыядычнасць праходжання прафілактычных аглядаў.
Тым, каму няма 40, рабіць чэкап арганізма неабходна адзін раз на тры гады, астатнім – штогод.
— Дыспансерызацыя накіравана на выяўленне захворванняў на ранніх стадыях, калі лягчэй іх лячыць, а таксама фактараў рызыкі развіцця апошніх, — расказвае ўрач агульнай практыкі (загадчык аддзялення ўрачоў агульнай практыкі) Пастаўскай цэнтральнай раённай бальніцы Анастасія Танана. — За мінулы год на Пастаўшчыне яе прайшлі 23 796 чалавек. У 123 з іх у выніку абследаванняў былі ўпершыню выяўлены хваробы сістэмы кровазвароту, у 44 — анкалагічныя захворванні, у 29 — цукровы дыябет, у 6 — хранічная абструктыўная хвароба лёгкіх. Пры гэтым людзі нават не падазравалі, што маюць такія праблемы са здароўем. 487 чалавек на падставе праведзенага медыцынскімі работнікамі анкетавання ўнесены ў групу рызыкі па развіцці хвароб сістэмы кровазвароту, бо гэтыя хваробы ёсць у іх блізкіх і могуць перадавацца ў спадчыну. У 245 чалавек існуе рызыка развіцця цукровага дыябету, у 186 — анкалагічных захворванняў, у 81 — хранічнай абструктыўнай хваробы лёгкіх. Ім дадзены рэкамендацыі, як гэтага пазбегнуць.
Пачаўся новы год. А значыць, многім з нас трэба будзе зноў праходзіць дыспансерызацыю.
У Паставах прайсці яе можна ў паліклініцы цэнтральнай райбальніцы (кабінет №15) або ў амбулаторыях урачоў агульнай практыкі №№1, 2, 3. У сельскай мясцовасці – на ФАПах або ва ўчастковых бальніцах.
Для асоб, якія не могуць наведаць медустанову па стане здароўя, арганізуецца выезд медыцынскага работніка дамоў. Запіс па тэлефоне 3-15-65. Знайдзіце час для прафагляду!
Алена Шапавалава
