Гэты год для Пастаў будзе асабліва насычаным рознымі культурнымі мерапрыемствамі. Нас чакаюць выставы, канцэрты, спектаклі, дыялогавыя пляцоўкі, фестывалі… Многае рыхтуюць мясцовыя культработнікі. Так, прадстаўнікі Цэнтра культуры і народнай творчасці раёна запусцілі праект «Пастаўшчына рамесная», у рамках якога будзе створана ўнікальнае пано ў выглядзе карты раёна.
— Мы зробім карту на палатне памерам 2х1,5 метра з маленькіх элементаў паясоў, — расказвала адна з аўтараў праекта — кіраўнік народнай студыі «Майстры» пры Доме рамёстваў «Стары млын» Алена Крывенькая. — Іх будуць ткаць пастаўчане на майстар-класах, якія правядзём я і мая калега Крысціна Брэская. У адной рабоце збіраемся аб’яднаць усе арганізацыі горада, людзей розных прафесій і ўзростаў. Мэта праекта — паказаць народную творчасць знутры і далучыць гараджан да рамеснай дзейнасці.
Ткацтва як від традыцыйнай народнай творчасці выбрана невыпадкова. Раней яно было адным з асноўных рамёстваў на Пастаўшчыне. Ну а выраб паясоў не патрабуе складаных прыстасаванняў, ткаць можна на дошчачках і бёрдах. Іх, а таксама запраўленыя асновы прынясуць у працоўныя калектывы майстрыхі і пакажуць, як пераплятаць ніткі, каб атрымаўся задуманы ўзор.
Прыняць удзел у стварэнні элемента пояса змогуць як адзін, так і некалькі чалавек, абмежаванняў тут не будзе. Колькі ў выніку вырабяць такіх элементаў, пакуль невядома.
— Мы адправім пісьмы ва ўсе арганізацыі горада, — працягвала Алена Крывенькая. — Спадзяёмся, яны адгукнуцца на нашу прапанову. Будзем чакаць ахвотных і ў Доме рамёстваў, дзе таксама арганізуем майстар-класы. Таму прыходзьце! Ну а зрабіць першыя элементы можна будзе ўжо 20 лютага ў раённым Доме культуры. Там падчас сходу па падвядзенні вынікаў работы народнагаспадарчага комплексу Пастаўшчыны за 2025 год мы прэзентуем свой праект.
Фінішуе «Пастаўшчына рамесная» ў снежні. На цырымоніі закрыцця культурнай сталіцы ў Паставах аўтары праекта прадставяць гатовае пано і падораць яго раёну. Вакол унікальнай карты будуць змешчаны эмблемы арганізацый, чые прадстаўнікі прыклалі руку да яе стварэння.
Алена Шапавалава
