Наступіла вясна — і прыбавілася кліентаў у цырульнях. Іх у Паставах нямала — выбірай якую хочаш! У вёсках жа бытавыя, у тым ліку і цырульніцкія, паслугі аказвае толькі райбыткамбінат.
Вось і той раніцай, калі я наведалася ў цырульню райбыткамбіната, што на плошчы Леніна, два майстры адпраўлялілся на раён. Дашу Лушчык чакалі ў Гуце, Карыну Навіцкую — у Парыжы. Яшчэ два — Ангеліна Шаламава і Яна Воранава — заставаліся абслугоўваць кліентаў на месцы.
Тамара Белянка, прыёмшчык заказаў:
— Я вельмі задаволеная працай нашых маладых майстроў. Усе чатыры скончылі Полацкі дзяржаўны хіміка-тэхналагічны каледж. Ангеліна Шаламава працуе ў нас 6 гадоў, Даша Лушчык і Карына Навіцкая — 4. У жніўні мінулага года ў калектыў прыйшла Яна Воранава. Усе яны старанныя, уважлівыя, маюць сваіх кліентаў. Адным словам, годная змена тым, хто ўжо не працуе ў нас. Спадзяюся, нашы дзяўчаты нікуды не з’едуць. Такія кадры нам вельмі патрэбныя.
Хвалілі мне маладое папаўненне і кліенткі. Адна з іх казала: «Я наведвалася ў розныя пастаўскія цырульні. Найбольш спадабалася работа гэтых майстроў. Зараз хаджу толькі сюды і атрымліваю задавальненне. Пабываеш у маладых руках — здаецца, і сама памаладзееш».
Дзяўчаты прызналіся, што прафесія ім падабаецца. Асабліва радасна, калі кліенты задаволеныя. Аднак здараюцца і засмучэнні: людзі розныя і па-рознаму паводзяць сябе. Таму немалаважна знайсці з імі агульную мову. Хацелася б і большай зарплаты…
Ну а самы вопытны майстар у цырульні — Наталля Пронька. У яе вялікі стаж работы і бясспрэчнае майстэрства, з’яўляецца лаўрэатам звання «Чалавек года Пастаўшчыны-2022», яе фотаздымак неаднаразова заносіўся на Дошку гонару райбыткамбіната.
Заўтра ў цырульнікаў (як і ва ўсіх бытавікоў і камунальшчыкаў) — прафесійнае свята. Але некаторыя з іх нават у гэты дзень будуць на сваіх рабочых месцах ствараць прыгажосць іншым: рабіць завіўкі і прычоскі, падстрыгаць, фарбаваць, меліраваць валасы. Вясна падштурхоўвае прыгажэць.
Фаіна Касаткіна
