3 дыпломам І ступені вярнулася на мінулым тыдні з абласнога інтэлектуальнага турніру «Эканамічныя веды — аснова паспяховага бізнесу» каманда Пастаўскай гімназіі ў складзе навучэнцаў 10 і 11 класаў Паліны Бурак, Мікіты Снапка, Дзіяны Счаснай, Дзяніса Турлы і Ксеніі Шалугінай.
Турнір, арганізатарамі якога выступілі галоўнае ўпраўленне па адукацыі Віцебскага аблвыканкама, Віцебскі абласны палац дзяцей і моладзі, Інкубатар малога прадпрымальніцтва ТАА «Прававая група «Закон і Парадак» і Галоўнае ўпраўленне Нацыянальнага банка Рэспублікі Беларусь па Віцебскай вобласці, пачаўся яшчэ ў лютым. Першы этап праводзіўся ў фармаце анлайн-тэсціравання ў афіцыйнай групе палаца «ВКонтакте«. Удзел у ім прымалі каля 140 каманд з усяго паўночнага рэгіёна. З іх у фінал выйшлі 7 найлепшых, у ліку якіх аказаліся і пастаўскія гімназісты.
Сваю эрудыцыю і веды ў галіне эканомікі фіналісты дэманстравалі ў чатырох інтэлектуальных конкурсах. Спачатку трэба было разгадаць «Эканамічную крыжаванку», затым — хутка і правільна адказаць на пытанні «Мазгавога штурму» і «Медыяэканомікі». Па іх выніках былі вызначаны каманды, якія сустрэліся ў апошнім выпрабаванні «Суперфінал». У ім пастаўчанам супрацьстаялі прадстаўнікі гімназіі №1 Віцебска. І нашы землякі абыгралі іх!
— Пытанні ў фінале былі даволі складаныя, — расказвала трэнер каманды «Акулы бізнесу», настаўнік матэматыкі Пастаўскай гімназіі Ала Шырко. — Нават мы, педагогі, якія суправаджалі вучняў, не адразу маглі адказаць на некаторыя з іх. Нашы навучэнцы працавалі дружна. Было вельмі прыемна назіраць за іх зладжанай гульнёй. Яны слухалі адно аднаго, дапамагалі, падтрымлівалі.
Па словах Алы Уладзіміраўны, падрыхтоўка да турніру была дыферэнцыраваная. Адзін гімназіст рабіў упор на эканамічныя азначэнні, другі — на грашовыя адзінкі і рашэнне задач, трэці — на разгадванне рэбусаў і г.д. Дапамаглі заняткі па фінансавай адукаванасці з прадстаўнікамі ЦБП №230 ААТ «ААБ Беларусбанк», а таксама кансультацыі з трэнерам каманды.
Алена Шапавалава
Фота даслала Ала Шырко
