Сёння – Дзень работнікаў радыё, тэлебачання і сувязі
Па асфальтаваных і гравійных дарогах балаёўскай зоны імчыць аўтамабіль «Белпошты», за рулём якога Іван Казаровец, а ў кабіне разам з ім начальнік перасоўнага аддзялення паштовай сувязі №2 Пастаўскага рэгіянальнага вузла паштовай сувязі Вольга Протас.
Іх працоўны дзень пачынаецца задоўга да васьмі гадзін: да ад’езду правяраецца спраўнасць машыны і абсталявання, рыхтуюцца суправаджальныя дакументы, загружаюцца тавары, пасылкі, перыёдыка… І толькі пасля — у дарогу.
У зоне абслугоўвання экіпажа больш за 20 населеных пунктаў і каля тысячы чалавек. У кожную вёску машына даязджае па распрацаваным графіку пяць разоў на тыдзень, акрамя нядзелі і панядзелка. Стацыянарныя стаянкі арганізаваны ў Андронах, Балаях і іншых вёсках. З часам прыезду можна азнаёміцца на спецыяльных таблічках. Падчас прыпынку Вольга выплачвае пенсію, афармляе падпіску на перыёдыку, дастаўляе яе па адрасах. Паштовы аўтамабіль мае ўсё неабходнае абсталяванне (камп’ютар, счытвальнік банкаўскіх плацёжных карт, мадэм, электронныя вагі і іншае), каб забяспечыць насельніцтва поўным спектрам паслуг. Тут можна адправіць электронны перавод, пісьмо альбо пасылку, аплаціць камунальныя паслугі, папоўніць рахунак на мабільным тэлефоне, аформіць страхоўку альбо банкаўскі рахунак, купіць неабходныя тавары паўсядзённага попыту, атрымаць пенсію, а таксама зняць грошы з пластыкавай карткі ці разлічыцца пры яе дапамозе. Большасць наведвальнікаў набываюць на перасоўнай пошце прадукты харчавання, бо ні ў адной з аддаленых маланаселеных вёсак няма магазіна.
Іван Казаровец у паштовай сувязі працуе 17 гадоў, 6 з іх у адным экіпажы з Вольгай Протас. І ўвесь час па нязменным маршруце. Яны добра ведаюць сваіх кліентаў, іх запыты.
— Тандэм атрымаўся цудоўны! — гаварыла намеснік начальніка Пастаўскага рэгіянальнага вузла паштовай сувязі Ірына Нікіфаровіч. — Вольга ветлівая, старанная, адказная. Хутка выконвае ўсе аперацыі, актыўна рэкламуе новыя паштовыя паслугі. У Івана заўсёды ў спраўным стане аўтамабіль. Вадзіцель дапамагае з загрузкай тавару, у іншых справах. Не менш за начальніка хвалюецца, каб своечасова выканаць усе просьбы людзей, задаволіць іх патрэбы.
А яны самыя розныя. Акрамя прадуктаў харчавання, вяскоўцы часам заказваюць прамысловыя тавары, бытавую тэхніку. «Белпошта» выканае любы заказ.
— Мы — адзіная нітачка, якая звязвае пажылых вяскоўцаў са светам, — расказвалі работнікі ПАПС. — З нецярпеннем чакаюць раённую газету, з якой даведваюцца пра падзеі, што адбываюцца на Пастаўшчыне. І ў нас цікавяцца тым, што новага ў горадзе. Калі маладыя ўсю інфармацыю чэрпаюць з інтэрнэту, то мы для пажылых своеасаблівы wi-fi на колах. Яны сваімі навінамі падзеляцца, пра штосьці ў нас распытаюць, пра свае радасці і праблемы раскажуць.
Некаторыя часам прыходзяць да паштовай машыны, каб толькі пагутарыць. Вяскоўцы задаволеныя шырокім спектрам паслуг, якія аказвае перасоўнае аддзяленне паштовай сувязі, свежай і якаснай прадукцыяй па прымальных цэнах, ветлівасцю, увагай і кампетэнтнасцю работнікаў. А яны сваёй адкрытасцю, душэўнай цеплынёй умеюць знаходзіць агульную мову з людзьмі.
Анна Анішкевіч
