Жніво-2026 на Пастаўшчыне пачалося. Першымі стартавалі хлебаробы сельгаспрадпрыемства «Дунілавічы-агра».
На ўскраіне залатога поля галоўных герояў бліжэйшых тыдняў — камбайнераў і вадзіцеляў — віталі работнікі мясцовага сельскага Дома культуры і кіраўнік спраў Дунілавіцкага сельвыканкама Таццяна Кімстач.
Старажытны народны абрад «Зажынкі» заўсёды нясе ў сабе глыбокі сакральны сэнс. Гэта не проста прыгожая традыцыя, а даніна павагі зямлі-карміцельцы і тым, хто на ёй шчыруе. Загадчыца Дома культуры Іна Русецкая ў нацыянальным касцюме з паклонам зайшла ў жытнёвае поле і зжала сярпом важкія каласы, якія склала ў прыгожы сноп. Яго па традыцыі ўручыла дырэктару СП «Дунілавічы-агра» Андрэю Сарапененку. Пасля гэтага духмяным караваем пачаставалі ўсіх прысутных аграрыяў. Бібліятэкар Вольга Танана падарыла сувеніры на памяць.
Задача перад хлебаробамі стаіць адказная — правесці ўборку якасна, аператыўна і без страт, бо на рахунку кожнае зярнятка. Людзі настроены на выніковую працу.
Сярод тых, хто вывеў камбайны ў поле, — як вопытныя, так і маладыя механізатары. Настрой у дунілавіцкіх экіпажаў баявы. Галоўнае, каб спрыяла надвор’е.
Фіналам урачыстасці стаў гучны рокат камбайнавых матораў. Адзін за адным магутныя машыны рушылі ў поле, пакідаючы за сабой першыя ўбраныя метры азімага ячменю.
Анна Анішкевіч
