Павел Кеўліч з ААТ «Камайскі-агра» – чацвёрты тысячнік сярод вадзіцеляў раёна.
Лідарства на жніве для Паўла даўно стала звыклай справай. У яго працоўнай біяграфіі былі розныя сезоны, у тым ліку і рэкордныя, калі на рахунку значылася дзве і больш тысяч тон перавезенага збожжа. Каб у ліку першых перавезці такую колькасць тон, недастаткова проста моцна націскаць на педаль газу. Тут трэба правільна разлічыць кожную хвіліну, улічваць стан дарог паміж палямі, загадзя надзейна адрамантаваць машыну і сачыць за тым, каб яна не падвяла ў самы адказны момант уборачнай кампаніі. Павел Кеўліч у гэтай справе — сапраўдны прафесіянал. МАЗ, які служыць яму ўжо 17 гадоў, заўсёды дагледжаны, а сам вадзіцель сабраны і максімальна сканцэнтраваны на працы.
А яна нялёгкая. Таму ўшанаванне за старанне для чалавека мае асаблівую маральную каштоўнасць. Віншаванні перадавы вадзіцель прымаў ад дырэктара гаспадаркі Віталія Цыронка і старшыні пярвічнай прафсаюзнай арганізацыі Іны Пяткевіч. Яны адзначылі, што такія адказныя работнікі, як Павел, — сапраўдны залаты фонд камайскай зямлі, яе гонар і надзейная апора.
Падзякавала Паўлу за працу і важкі ўклад у агульны каравай і намеснік начальніка ўпраўлення па сельскай гаспадарцы і харчаванні райвыканкама Таццяна Андрэева. Яна пажадала вадзіцелю моцнага здароўя, лёгкіх дарог і новых працоўных дасягненняў. Заслужаную грашовую прэмію і дыплом уручыў старшыня раённай прафсаюзнай арганізацыі работнікаў аграпрамысловага комплексу Васілій Катовіч.
Сам Павел Кеўліч да сваёй славы ставіцца сціпла. Для яго галоўнае — своечасова даставіць хлеб новага ўраджаю ў засекі. Кароткі перапынак на віншаванні — і вадзіцель паспяшаўся за руль сваёй машыны. Наперадзе чакаюць новыя рэйсы і новыя тоны залатога збожжа.
Анна Анішкевіч
