Гарачая пара ўборкі ўраджаю заўсёды вызначае сваіх герояў. Сёлета прэтэндэнтаў на першага тысячніка сярод камбайнераў было некалькі. Урэшце гэтага намалоту дасягнуў Сяргей Дварко.
Ужо шмат гадоў запар падчас уборачнай кампаніі ён прыходзіць на дапамогу хлебаробам ААТ «Сцяг Перамогі-агра». Палі, дзе разгортваецца сапраўдная бітва за ўраджай, маюць для механізатара асаблівае значэнне. Тут у свой час працаваў на камбайне яго дзед. Менавіта ад яго Сяргей пераймаў першыя сакрэты гэтай няпростай, але пачэснай працы. Дзедавы ўрокі, памножаныя на асабісты вопыт і старанне, сталі тым фундаментам, які дазволіў лідару сёлетняй уборачнай упэўнена крочыць да працоўнага рэкорда.
— На ўборцы я з 8 гадоў, — расказваў Сяргей Дварко. — Разам з дзедам катаўся на «Ніве», прыглядаўся да яго работы. Бацька быў аграномам. Можа, таму і не дзіўна, што я люблю жніво. Зімой мне сняцца жніўныя палеткі. З вясны назіраю за ўсходамі, прыкідваю, на якім полі будзе добры ўраджай.
Самастойна працаваць Сяргей пачынаў на «Лідзе-1300». 13 гадоў убіраў на «Лідзе-1600». У 2024 годзе яму даверылі новы КЗС-1218. Першы год яго абкатваў. Летась намалаціў амаль 1 700 тон. А сёлета стаў першым камбайнерам-тысячнікам. Паспрыяла гэтаму нядрэнная ўраджайнасць азімых ячменю і рапсу. Па словах перадавіка, немалаважнай аказалася падтрымка калег-камбайнераў, сям’і.
Павіншаваць першага камбайнера-тысячніка прыехалі кіраўніцтва раёна і сельгаспрадпрыемства, прадстаўнікі малочнага завода, раённай арганізацыі РГА «Белая Русь», удзельнікі мастацкай самадзейнасці Цэнтра культуры і народнай творчасці раёна.
— Малайчына! — паціскаючы руку тысячніку, гаварыў Сяргей Чэпік. — Абышоў раённых карыфеяў і зрабіў сабе падарунак да Дня будаўніка. Новых перамог табе!
Анна Анішкевіч
