Жніво ў самым разгары: гудуць камбайны, курсіруюць напоўненыя збожжам грузавікі, кіпіць работа на зернесушыльных комплексах. Аднак сапраўдны гаспадар зямлі заўсёды глядзіць на некалькі крокаў наперад. Пакуль у засекі засыпаюцца тоны сёлетняга ўраджаю, працавітыя хлебаробы ўжо актыўна закладваюць трывалы падмурак пад новы.
Паралельна з уборкай якасна і аператыўна вядзецца падрыхтоўка глебы і сяўба азімага рапсу. Сёлета стаўка на гэту культуру зроблена асабліва важкая. Улічваючы эканамічную выгаду рапсу, пад яго ў раёне ў бягучым сезоне адвялі плошчу ў 4 800 гектараў. Такі крок патрабуе максімальнай самааддачы ад кожнага ўдзельніка палявых работ і строгага выканання ўсіх тэхналагічных патрабаванняў. Аднымі з першых у раёне сяўбу гэтай культуры распачалі хлебаробы сельгаспрадпрыемства «Дунілавічы-агра», ААТ «Сцяг Перамогі-агра» і «Камайскі-агра».
Планы напружаныя, але цалкам рэальныя. І тут вельмі важна не ўпусціць час. Поспех у полі заўсёды забяспечваюць людзі — сапраўдныя майстры сваёй справы. Аграрыям гаспадарак, якія ўваходзяць у склад аграпрамысловага аб’яднання, дапамагаюць механізатары малочнага завода. Сярод іх — Артур Чапскас, які задзейнічаны на сяўбе ў ААТ «Сцяг Перамогі-агра». Прафесіяналізм Артура, дысцыпліна і шчырае яго імкненне дапамагчы хлебаробам дае выдатныя вынікі. Штодзень механізатар засявае да 30 гектараў плошчы, упэўнена ўтрымліваючы высокую планку якасці.
Анна Анішкевіч
