13 верасня бягучага года азнаменавалася для Пастаў падзеяй, напоўненай глыбокім сакральным сэнсам, супольнай малітвай і шчырай радасцю соцень людзей. У гэты дзень адбылося ўрачыстае пасвячэнне (кансэкрацыя) новага касцёла і алтара парафіі Езуса Міласэрнага.
Ад малітвы да велічнага храма
Гісторыя каталіцкай супольнасці ў Паставах мае багатыя і глыбокія карані, якія бяруць пачатак з XVI стагоддзя. На працягу апошніх дзесяцігоддзяў пасля адраджэння рэлігійнага жыцця адзіным каталіцкім храмам у райцэнтры заставаўся касцёл Беззаганнага Зачацця Найсвяцейшай Панны Марыі і Святога Антонія Падуанскага, якому больш за 100 гадоў. Будаўніцтва новага касцёла па вуліцы Касманаўтаў стала магчымым дзякуючы ініцыятыве саміх мясцовых жыхароў, якія вельмі хацелі мець у сваім мікрараёне храм. Сваю прапанову яны агучылі былому пробашчу касцёла Святога Антонія Падуанскага Анджэю Возьняку і былому біскупу Віцебскай дыяцэзіі Уладзіславу Бліну.
Гістарычнае рашэнне аб арганізацыі новай парафіі і ўзвядзенні другога ў горадзе касцёла было прынята і агучана ўжо біскупам Алегам Буткевічам падчас душпастырскага візіту ў сакавіку 2014 года. Тады ж было вызначана, што новая святыня атрымае тытул Езуса Міласэрнага. У красавіку 2016 года на выдзеленай пад будаўніцтва пляцоўцы па вуліцы Касманаўтаў іерарх урачыста асвяціў крыж — сімвал распачатай вялікай і адказнай працы.
Маштабнае будаўніцтва разгарнулася ў 2019 годзе. Першыя цаглінкі ў падмурак святыні закладваў ксёндз Анджэй Бульчак. А калі ў 2022 годзе ён пакінуў Беларусь, клопат пра будаўніцтва пераняў новы пробашч ксёндз-канонік Павел Самсонаў. Кожная цаглінка ў сценах гэтага касцёла, кожны элемент яго прыгожага інтэр’ера — вынік працы канкрэтных людзей: хтосьці ахвяраваў грошы, хтосьці дапамагаў фізічна на будаўнічай пляцоўцы, а нехта нястомна маліўся аб тым, каб Бог даў сілы і магчымасць завяршыць гэты праект.
Калі неба злучаецца з зямлёй
13 верасня стала кульмінацыяй шматгадовых чаканняў. Рытуал кансэкрацыі касцёла і алтара здзейсніў біскуп Алег Буткевіч. Спачатку ён акрапіў святой вадой сцены храма і вернікаў — як напамін пра хрост і заклік да ўнутранага ачышчэння. Пасля літургіі слова наступіў самы хвалюючы момант — намашчэнне алтара і сцен святыні святым алеем (хрызмам). Абрад сімвалізуе, што з гэтага моманту будынак цалкам прысвечаны Богу і становіцца Яго домам на зямлі. Распаленае кадзіла — знак таго, што малітвы пастаўчан, як водар дыму, будуць узносіцца да неба. Завяршыўся абрад запальваннем святла ў касцёле, што азначае прысутнасць Хрыста — Святла для свету. У алтар таксама змясцілі рэліквіі Святой Фаўстыны і асвяцілі новы абраз Езуса Міласэрнага, які напісаў мастак з Мінска Павел Кандрусевіч.
Звяртаючыся да прысутных з пастырскім словам, біскуп Алег Буткевіч падкрэсліў гістарычную важнасць гэтай падзеі не толькі для Пастаўшчыны, але і для ўсёй каталіцкай супольнасці Віцебскай дыяцэзіі. Ён адзначыў, што пабудаваць касцёл з цэглы, каменю і бетону — гэта выдатны, велічны чын, які патрабуе вялікіх рэсурсаў. Аднак яшчэ важней пабудаваць «жывы касцёл» ва ўласных сэрцах, напаўняючы кожны дзень учынкамі дабрыні і міласэрнасці. Біскуп выказаў словы глыбокай удзячнасці кожнаму, хто ахвяраваў свой час, фінансавыя сродкі, талент і фізічную працу на гэтую святую мэту.
Ён прыгадаў вядомы гістарычны факт, калі старажытнагрэчаскі навуковец Архімед пасля свайго найвялікшага адкрыцця бег па вуліцах і радасна крычаў: «Эўрыка!». А сёння жыхары Пастаў маюць поўнае права з такім жа захапленнем усклікнуць: «Эўрыка! Мы маем новы касцёл!»
Папа Леў XIV моліцца за Паставы
Урачыстасць у Паставах наведалі шматлікія ганаровыя госці. Сярод іх — наш зямляк, першы саветнік Апостальскай нунцыятуры ў Грузіі і Арменіі ганаровы прэлат Яго Святасці Папы Рымскага Аляксандр Рагіня, які таксама ўклаў у будаўніцтва святыні і фінансавыя сродкі, і частку свайго сэрца. Ксёндз-прэлат Аляксандр перадаў важную і радасную вестку, якая выклікала хвалю апладысментаў і слёзы радасці на вачах вернікаў. Ён запэўніў, што расказваў Папу Рымскаму Льву XIV пра Паставы і пра тую вялікую справу, якую робяць мясцовыя людзі дзеля хвалы Божай. Больш за тое, высокі госць перадаў спецыяльнае пасланне ад Папы Льва XIV ксяндзу-каноніку Паўлу Самсонаву і ўсім парафіянам, у якім — апостальскае благаслаўленне і словы падтрымкі для ўсіх жыхароў рэгіёна.
Разам з лістом ад пантыфіка парафія атрымала і бясцэнны матэрыяльны знак увагі з Ватыкана — асабісты падарунак Папы — ружанец і просьбу маліцца на ім за мір ва ўсім свеце і згоду ў сем’ях. Гэтая рэліквія цяпер будзе захоўвацца ў касцёле Езуса Міласэрнага як напамін пра тое, што нават невялікі беларускі горад звязаны нябачнымі, але трывалымі духоўнымі ніткамі з самым сэрцам Паўсюднага каталіцкага Касцёла.
Радасць супольнасці
На ўрачыстасці кансэкрацыі прысутнічалі прадстаўнікі мясцовай улады: намеснік старшыні райвыканкама Станіслаў Чымбург, начальнік аддзела ідэалагічнай работы і па справах моладзі Юлія Чагарына і галоўны спецыяліст гэтага аддзела Наталля Субко, кіраўнікі прадпрыемстваў і арганізацый, якія ўнеслі свой уклад у будаўніцтва храма. Іх прысутнасць на свяце падкрэсліла высокі ўзровень міжканфесійнага міру, згоды і канструктыўнага, плённага супрацоўніцтва паміж дзяржавай і каталіцкай супольнасцю. Прадстаўнікі іншых хрысціянскіх канфесій таксама прыйшлі раздзяліць радасць і павіншаваць вернікаў маладой парафіі са значнай падзеяй, што яскрава сведчыць пра дружалюбнасць, узаемапавагу і адзінства жыхароў нашага раёна. Станіслаў Чымбург зачытаў прывітальны адрас ад кіраўніцтва раёна і перадаў пробашчу падарункі для парафіі.
На завяршэнне святой Імшы біскуп Алег Буткевіч, пробашч касцёла Езуса Міласэрнага ксёндз-канонік Павел Самсонаў і прадстаўнік Папы Рымскага Аляксандр Рагіня падпісалі акт пасвячэння касцёла.
Затым свята прадоўжылася на прыкасцельнай тэрыторыі. Там усіх частавалі юшкай, пловам, салодкімі прысмакамі. А заслужаны аматарскі калектыў Рэспублікі Беларусь фальклорны ансамбль «Паазер’е» парадаваў сваім цудоўным выступленнем.
Анна Анішкевіч
Фота Марыны Сінкевіч («Каталіцкі веснік»)
