Свята мёду і падзякі адбудзецца ў аўторак, 8 верасня, у касцёле Езуса Міласэрнага ў 5-м гарадку
У маладой пастаўскай парафіі Езуса Міласэрнага ўжо стала традыцыяй адзначаць свята мёду і маліцца за пчаляроў. Не стане выключэннем і сёлетні год. Нягледзячы на напружаны час падрыхтоўкі святыні да ўрачыстай кансэкрацыі (асвячэння), пробашч ксёндз-канонік Павел Самсонаў шчыра запрашае ўсіх жадаючых раздзяліць радасць сумеснай малітвы ў аўторак, 8 верасня, калі па каталіцкім календары адзначаецца Нараджэнне Найсвяцейшай Панны Марыі. Гэта час, калі зямля шчодра дзякуе чалавеку за працу, а кожная гаспадарка падводзіць вынікі летняга сезона. Сярод тых, чыя праца патрабуе асаблівага цярпення, мудрасці і благаслаўлення, — пчаляры. Пчала заўсёды лічылася Божым стварэннем, сімвалам працавітасці, чысціні і ахвярнасці, а мёд — каштоўным дарам Неба, які нясе здароўе і сілы.
Урачыстасць распачнецца ў 19 гадзін святой Імшой, падчас якой будзем дзякаваць Стварыцелю за сёлетні сельскагаспадарчы год і прасіць заступніцтва для ўсіх, хто клапоціцца пра пчаліныя сем’і. Узнясём сумесную малітву за тое, каб праца пчаляроў заўсёды была плённай, прыносіла карысць і радасць людзям, а Божая міласэрнасць ахоўвала іх дамы і пчальнікі ад любых нягод.
Падчас Набажэнства адбудзецца традыцыйнае асвячэнне мёду новага збору. Прыносьце з сабой духмяныя дары са сваіх пчальнікоў, каб благаславіць іх і падзяліцца гэтай святасцю з блізкімі. Пасля заканчэння Літургіі свята працягнецца на прыкасцельнай тэрыторыі. Вас чакае цёплая парафіяльная сустрэча: частаванне духмянай гарбатай на зёлках і хатняй выпечкай, а таксама магчымасць пагутарыць з майстрамі пчалярскай справы і даведацца пра сакрэты іх рамяства.
Прыходзьце цэлымі сем’ямі, запрашайце суседзяў і сяброў! Няхай гэты вераснёўскі дзень напоўніць нашы сэрцы асалодай Божага слова, суцяшэннем і душэўным цяплом.
Анна Анішкевіч
