Калі глядзіш на выніковыя лічбы гэтага лета, разумееш: за кожным цэнтнерам стаіць не проста тэхніка, а каласальная праца нашых землякоў. Сёлета агульны каравай Пастаўшчыны ўнушальны — 47 582 тоны пры сярэдняй ураджайнасці 28,4 ц/га. Але галоўнае золата раёна — гэта, безумоўна, людзі. Толькі ўявіце, 28 камбайнераў і 23 вадзіцелі перасягнулі рубеж у тысячу тон! Сапраўднымі маякамі жніва сталі працаўнікі ААТ «Навасёлкі-Лучай»: камбайнер Віктар Рогаў, які выдаў з бункера 2 560 тон збожжа, і вадзіцель Аляксандр Мацур, які перавёз ад камбайнаў 2 693 тоны. У гэтую суботу, 17 кастрычніка, афіцыйная дэлегацыя Пастаўшчыны ў складзе 40 чалавек адправіцца ў Міёры, дзе многія нашы землякі падымуцца на галоўную сцэну абласных «Дажынак».
Пастаўчане едуць на свята не з пустымі рукамі. Умельцы Цэнтра культуры і народнай творчасці Пастаўскага раёна і Дома рамёстваў «Стары млын» вязуць з сабой паўтараметровы трох’ярусны сноп ручной работы на традыцыйны конкурс «Дажыначны сноп». Будзе чым уразіць журы і на новым абласным конкурсе «Найлепшая лялька «Прыгажуня жніва», прысвечаным Году беларускай жанчыны. Спецыяльна да яго нашы майстры з любоўю змайстравалі дзвюх каларытных саламяных прыгажунь. Акрамя таго, творчая каманда падрыхтавала арыгінальныя забавы для тэматычнага падворка раёна. А які арсенал запальных песень чакае гасцей фестывалю! Што да галоўнага дажыначнага каравая Пастаўшчыны, то над яго эксклюзіўным дызайнам зараз чаруюць умельцы нашага хлебазавода. Якім будзе гэты шэдэўр — убачым ужо зусім хутка.
Але не ўсе вырабы адправяцца ў Міёры — некаторыя застануцца радаваць вока дома. Спецыяльна для конкурсу на найлепшую кампазіцыю з саламянных рулонаў, якія традыцыйна ўпрыгожваюць да свята дарогі краіны, пастаўчане падрыхтавалі нешта асаблівае. Лакацыя размясцілася за вёскай Сіўцы Курапольскага сельсавета. Яна ўяўляе сабой грандыёзную трох’ярусную экспазіцыю, на якой прыгожая беларусачка ў нацыянальным строі стаіць у шчодрым на кветкі полі і, трымаючы ў руках сноп з каласоў, усміхаецца ўсім, хто праязджае міма.
Гэты арт-аб’ект — плён сумеснай калектыўнай працы механізатараў ААТ «Хацілы-агра» і настаўнікаў дзіцячай школы мастацтваў імя А. Ромера. Спачатку за справу ўзяліся аграрыі: Станіслаў Смірноў на маніпулятары ювелірна склаў масіўныя рулоны, якія Дзмітрый Крываручка і Мікіта Калінскі аператыўна падвезлі на сваіх велікагрузах. Затым, усталяваўшы будаўнічыя рыштаванні, да справы далучыліся таленавітыя мастакі, якія і ператварылі звычайныя рулоны ў сапраўдную карціну. Свой мастацкі талент і душу ў гэты вобраз уклалі Жанна Курдо, Ганна Дрэлінская, Уладзімір Макаркоў, Юлія Маісеева, Марына Баразна і Карына Левачова. Атрымалася неверагодна прыгожа, душэўна і па-сапраўднаму святочна.
Калі нават на пад’ездах да Пастаў ствараецца такая прыгажосць, уяўляеце, які маштаб чакае гасцей на абласным свяце? А паколькі Міёры зусім недалёка, «Дажынкі» — выдатная нагода для сумеснай сямейнай паездкі на выхадныя. Арганізатары падрыхтавалі праграму, якая дакладна не дасць засумаваць! Горад літаральна ператворыцца ў адну вялікую інтэрактыўную пляцоўку: ад каларытных падворкаў з выставамі караваяў і вытанчаных лялек «Прыгажуня жніва» да брутальных спаборніцтваў па шчапанні дроў і магутнага агратэхнапарка пад адкрытым небам. Сапраўдным відовішчам абяцае стаць дзённае флайборд-шоу на мясцовым возеры і катанне на катарах, а завершыцца ўсё вялікім вячэрнім канцэртам з удзелам запрошаных зорак беларускай эстрады і святочным феерверкам над набярэжнай.
Пастаўчане ўклалі ўсю душу ў гэты хлеб і творчасць, таму яны сапраўды заслужылі, каб у Міёрах іх падтрымалі самыя гучныя і шчырыя апладысменты землякоў. Прыязджайце ўсёй сям’ёй — раздзяліце гэта свята разам!
Крысціна Рубель
