Асаблівая абстаноўка патрабуе няўхільна выконваць санэпідрэжым.
Як раней паведамлялася ва ўсіх сродках масавай інфармацыі, з 9 кастрычніка ў Беларусі ўведзены абавязковы масачны рэжым. Падчас рэйду, у якім удзельнічалі супрацоўнікі раённага цэнтра гігіены і эпідэміялогіі Святлана Жардзецкая, Ірына Бабіч, Ганна Кішко і карэспандэнт «ПК», яго парушэнняў не выяўлена. А як выконваюцца іншыя супрацьэпідэмічныя патрабаванні?
Накіроўваемся ў цырульню «Время красоты», размешчаную ў мікрараёне шостага гарадка. Гэты аб’ект выбраны невыпадкова. РайЦГЭ сёлета ўжо правяраў яго і выявіў нямала парушэнняў санэпідрэжыму, вынес прадпісанне аб ухіленні. У цырульні чатыры рабочыя месцы і ніводнага кліента. Пытанняў да цырульніка Марыі Кобзар шмат: ці ёсць ва ўстанове комплексны план па папярэджанні кавіда? чым праводзіцца дэзынфекцыя памяшкання? як апрацоўваюцца і дзе захоўваюцца інструменты? якія патрабаванні інструкцыі? і г.д. Майстар у поўнай разгубленасці і ні на адно не можа адказаць кампетэнтна. Супрацоўнікі райЦГЭ ў чарговы раз фіксуюць недахопы і выклікаюць індывідуальнага прадпрымальніка, якому належыць цырульня. Прад’яўляюць прэтэнзіі, паведамляюць пра тое, што на яго будзе складзены пратакол, давядзецца заплаціць штраф у памеры не менш за 5 базавых велічынь.
Наведваемся ў цырульню «Магия», уласнікам якой з’яўляецца той самы прадпрымальнік. Тут работнікі вядуць сябе больш упэўнена, але недахопы ўсё роўна ёсць. Урач-гігіеніст Святлана Жардзецкая і яе памочнік Ірына Бабіч цярпліва даводзяць свае патрабаванні, тлумачаць, што і як трэба рабіць.
Наступныя аб’екты — гандлёвыя. З памочнікам урача-гігіеніста па гігіене харчавання Ганнай Кішко заходзім у магазін «Молодёжный» Пастаўскага філіяла Віцебскага аблспажыўтаварыства. І тут я ўпершыню падчас рэйду чую кампетэнтны дыялог урача і прадаўца Святланы Дань. Святлана без запінкі адказвае на ўсе пытанні гігіеніста, паказвае дэзынфікуючыя сродкі, расказвае, як імі карыстацца, паведамляе пра рэгулярнае праветрыванне памяшкання, захаванне масачнага рэжыму і іншае. Прэтэнзій да работніка прылаўка няма. У «Евроопте», што ў мікарараёне пятага гарадка, таксама не выяўлена парушэнняў, за выключэннем таго, што ў гэтым месяцы не запаўняецца журнал тэмпературнага рэжыму.
А як не заглянуць у абноўлены спажыўкааператарскі магазін «ProЗапас» у цэнтры горада? Яго дзверы былі зачыненыя. «Якраз праводзім чарговую супрацьэпідэмічную апрацоўку памяшкання», — патлумачылі работнікі, але нас упусцілі. Спецыяліст райЦГЭ парушэнняў не выявіла і адзначыла: «Умеюць жа працаваць, калі захочуць. Але трэба было падштурхнуць. Некалькі раней аштрафавалі таваразнаўца — і зрухі відавочныя».
Гаворачы ў цэлым пра гандлёвыя аб’екты, якія праверылі, трэба адзначыць, што ў кожным з іх маецца дастаткова дэзынфікуючых сродкаў для апрацоўкі паверхні сцен і вільготнай уборкі, антысептыкаў для пакупнікоў, сродкаў індывідуальнай аховы для персаналу. Праводзіцца ўваходны кантроль не толькі тэмпературы цела, але і стану здароўя (на наяўнасць ліхаманкі, кашлю, насмарку). На падлозе нанесена разметка сацыяльнага дыстанцыравання. Увесь персанал — у масках. Таго ж самага патрабуюць і ад пакупнікоў.
Заўважыла, што падчас рэйду гігіеністы абавязкова цікавіліся ў тых, з кім размаўлялі, ці правакцынаваліся яны, пераконвалі ў неабходнасці зрабіць прышчэпку. І нястомна даводзілі, што, толькі няўхільна выконваючы ўсе супрацьэпідэмічныя патрабаванні, можна абараніцца ад небяспечнай інфекцыі. Варта прыслухацца да парад спецыялістаў.
Фаіна Касаткіна. Фота аўтара
