Пакуль мароз трымае глебу
Едзем у бок Ёдаўцаў. У многіх месцах яшчэ ляжыць снег. А па полі недалёка ад дарогі на высокай хуткасці рухаецца самаходны апырсквальнік «Раса». Шырокія колы ўтрымліваюць агрэгат на глебе, не пакідаючы слядоў і не пашкоджваючы раслінак.
— Падсяваць травы пачалі ў канцы лютага, — расказвала галоўны аграном ААТ «Камайскі-агра» Аксана Касякова. — Мэта падсеву — узбагаціць травастой каштоўнымі кармавымі травамі, павялічыць яго гушчыню, што будзе садзейнічаць павышэнню прадукцыйнасці кармавых угоддзяў. Гэту работу сёлетняй вясной трэба выканаць на 1 600 гектарах. 200 з іх — паша і сенакосы, астатнія — азімыя. Выкарыстоўваем не толькі ўсюдыход «Раса», на якім, як і ў мінулыя гады, рупіцца Аляксандр Буката, але і манеўраны трактар Massey Ferguson 6713 Уладзіміра Карыцькі. Зараз спрыяльны час, пакуль мароз з ночы трымае глебу, трэба спяшацца. Для падсеву выкарыстоўваем канюшыну, цімафееўку і іх класічную сумесь. Падвозяць насенне ў поле Віктар Сінкевіч і Уладзімір Зінкевіч.
Анна Анішкевіч
