Кожны год прырода выпрабоўвае земляробаў на трываласць, прафесіяналізм і разваротлівасць, падносячы розныя складанасці, якія перашкаджаюць атрымаць высокі ўраджай, убраць яго ў сціслыя тэрміны. Мінулай восенню ўсё складвалася, здаецца, найлепшым чынам: азімыя пасеялі на запланаванай плошчы, у глебе быў неабходны запас вільгаці, што спрыяла дружным усходам. Пасевы паспяхова перазімавалі. Вясной своечасова правялі іх падкормку, апрацавалі супраць пустазелля і шкоднікаў. Адным словам, хлебаробы не пашкадавалі ні сіл, ні сродкаў і зрабілі ўсё магчымае, каб мы былі з хлебам.
А вось прырода ў пачатку вясны паскупілася на вільгаць. У маі здарыліся замаразкі, і раслінкі ад іх пацярпелі. З апошняй дэкады мая і да канца чэрвеня ішлі зацяжныя дажджы. У пачатку ліпеня неба нарэшце парадавала сонцам, хутка саспеў азімы ячмень, і камбайны выехалі ў поле. Але тэмпы ўборкі стрымлівала пераўвільготненая глеба.
З кім бы з камбайнераў, вадзіцеляў, аграномаў, кіраўнікоў ні гутарыла, усе ўспаміналі мінулагодняе жніво, калі на 2 жніўня было абмалочана 62% плошчы. Сапраўды, летась тэмпы былі высокімі. Ужо 21 ліпеня на Пастаўшчыне ўшаноўвалі першага ў Віцебскай вобласці камбайнера-тысячніка Генадзія Анкудовіча з ААТ «Навасёлкі-Лучай». Праз тры дні тысячу тон збожжа перавёз малады вадзіцель гэтай гаспадаркі Аляксандр Дунец. Рады тысячнікаў імкліва папаўняліся. Са старшынёй райкама прафсаюза работнікаў аграпрамысловага комплексу Васіліем Катовічам практычна кожны дзень выязджалі ў поле з віншаваннямі і падарункамі.
Сёлета зерневыя і зернебабовыя займаюць плошчу больш чым 19 тысяч гектараў. Убраны яны пакуль толькі на 2 700 га, што складае ўсяго 14% ад запланаванага. Ураджай вырас нядрэнны: азімы ячмень па раёне даў 27 цэнтнераў з гектара. А ў ААТ «Навасёлкі-Лучай» і «Хацілы-агра» — 68,4 і 56,5 ц/га адпаведна. У «Хацілы-агра» такая ж ураджайнасць і яравога. Масавую ўборку пшаніцы, трыцікале сельгаспрадпрыемствы яшчэ не пачыналі. І прычанай таму моцныя дажджы, якія не проста ўносяць значныя карэктывы ва ўборачныя работы, а практычна паралізавалі іх: 30 і 31 ліпеня па раёне не ўбрана ні аднаго гектара. Аграрыі занепакоеныя тым, як выратаваць вырашчанае. Людзі, тэхніка, зернесушыльныя гаспадаркі гатовы вытрымаць высокія тэмпы, а непагадзь спыніла работы на некалькі дзён.
Вядзецца ворыва
Пад ураджай наступнага года глебу трэба ўзараць на плошчы амаль 20 000 гектараў. Кожны дзень на палях Пастаўшчыны можна ўбачыць трактары з плугамі. Найшпарчэй гэта работа вядзецца ў ААТ «Сцяг Перамогі-агра», «Хацілы-агра», «Камайскі-агра», «Кураполле-агра». Нягледзячы на дажджы, тут за дзень узорваюць ад 15 да 40 гектараў.
Рыхтуюць кармы
Згодна з планам корманарыхтоўкі, скасіць другім укосам травы на Пастаўшчыне трэба на плошчы 13 600 гектараў. Па стане на 1 жніўня ў ААТ «Хацілы-агра», «Навасёлкі-Лучай», на сельгаспрадпрыемстве «Дунілавічы-агра» гэта работа праведзена на 43—40% плошчы. На ўмоўную галаву жывёлы па раёне нарыхтавана амаль 13 цэнтнераў кармавых адзінак. Найлепшая забяспечанасць кармамі на зімоўку ў ААТ «Навасёлкі-Лучай» і «Хацілы-агра» (амаль 15 ц. к. адз.). У апошняй гаспадарцы найбольш нарыхтавана сенажу ва ўпакоўцы (1 900 тон).
Паралельна вядзецца падсеў шматгадовых траў. Перавага аддаецца люцэрне.
Анна Анішкевіч
