Прэтэндэнтак – 13
У тэрытарыяльным цэнтры сацыяльнага абслугоўвання насельніцтва стартаваў конкурс «Найлепшы сацыяльны работнік». На гэта званне прэтэндуюць 13 прадстаўнікоў сацыяльнай сферы.
Конкурс складаецца з чатырох этапаў. На першым, прысвечаным Году гістарычнай памяці, канкурсанткі прэзентавалі свой «Радавод». Падчас другога этапа — «Прафесійнае тэсціраванне» — трэба будзе за пэўны час адказаць на пытанні тэстаў па раздзелах нарматыўна-прававой базы Рэспублікі Беларусь у сферы сацыяльнага абслугоўвання, правілах аховы працы і тэхнікі бяспекі, гісторыі Беларусі і роднага краю. На трэцім — у 10-хвілінным відэароліку «Мой рабочы дзень» адлюстраваць выкананне службовых абавязкаў. На чацвёртым — у аўтарскай праграме «Калі б я быў дырэктарам ТЦСАН» прапанаваць сваё бачанне развіцця ўстановы.
— Мэта конкурсу — павысіць прэстыж прафесіі сацыяльнага работніка, — адзначыла дырэктар ТЦСАН Марыя Ракоўская. — У нашай сістэме працуюць чулыя людзі. Яны шчыра адклікаюцца на чужыя праблемы і дапамагаюць іх вырашаць. А яшчэ нашы работнікі творчыя, крэатыўныя. Першы этап конкурсу гэта пацвердзіў. Па суме набраных балаў лідзіруе спецыяліст па сацыяльнай рабоце Наталля Койра.
Анна Анишкевич
