Рупяцца «Механікі» і «Зоркі»
Жніво — гарачая пара не толькі для аграрыяў, але і для маладых людзей, якія замест пасіўнага адпачынку на канікулах пажадалі паўдзельнічаць ва ўборцы ўраджаю на палях раёна. Актыўна дапамагаюць навучэнцы школ і Пастаўскага дзяржаўнага каледжа: адны з’яўляюцца памочнікамі камбайнераў, другія шчыруюць не зернетаках.
У ААТ «Хацілы-агра» дзейнічаюць два студатрады: «Механікі» і «Зоркі». Жадаючых трапіць у іх было шмат. Прыярытэт — правераным, каб навічкам было з каго браць прыклад. У адзін з дзён, калі я наведалася на зернесушыльны комплекс у Хацілах, студатрадаўцы пералапачвалі зерне на падлогавых сушылках.
Знаёмлюся з юнымі памочнікамі. Арцём Турла і Яўген Радзевіч — гараджане. Першы вучыцца ў СШ №1, другі закончыў 9 класаў СШ №3 і паступіў у Пастаўскі дзяржаўны каледж на тэхніка-механіка. На работу дабіраюцца па-рознаму, часта — на веласіпедах. У Тамары Крываручкі ў той дзень настрой быў прыўзняты: яна даведалася, што залічана на вучобу ў Ільянскі дзяржаўны аграрны каледж. Не прывыкаць да вясковай работы і Ульяне Волк. Дзяўчына выхоўваецца ў працавітай сям’і: бацька, Андрэй Казіміравіч, у гэтыя дні ўбірае на камбайне збажыну, браты Мікалай і Ілья задзейнічаны на адвозцы збожжа. Ужо другі сезон запар у студатрадзе Юля Мяньшова. Яна навучэнка 4-га курса нашага дзяржкаледжа, атрымлівае спецыяльнасці повара і афіцыянта.
Хвалілі юных памочнікаў загадчыца склада Марына Скрыдлеўская, старшыня пярвічнай прафсаюзнай арганізацыі сельгаспрадпрыемства Наталля Пабядзінская. Перыядычна наведвае студатрадаўцаў першы сакратар райкама БРСМ Кацярына Малевіч.
Анна Анішкевіч. Фота аўтара
