Яднаюцца творцы
У нашым горадзе і раёне шмат творчых людзей, якія спрабуюць свае сілы ў паэзіі і прозе. Вельмі важна, каб іх голас пачулі іншыя, асабліва аднадумцы. Таму мы і вырашылі аб’яднацца. 15 лістапада бягучага года стала днём нараджэння аматарскага літаратурнага аб’яднання «Світанак» пры Цэнтры культуры і народнай творчасці Пастаўскага раёна.
Удзячныя кіраўніку і супрацоўнікам цэнтра, якія ўзялі нас пад сваё крыло. Зараз у аб’яднанні 20 творцаў. Не сумняваюся, што яно будзе расці. Два разы на месяц збіраемся разам, чытаем свае творы і абмяркоўваем іх, удзельнічаем у літаратурных конкурсах, рыхтуем да друку літаратурную старонку ў «Пастаўскім краі», першы калектыўны зборнік. А нядаўна сустрэліся з творцамі Браслаўшчыны.
У той нядзельны дзень раптоўна ціскануў першы мароз і выпаў прыгожы бялюткі снег. З найлепшым настроем і самымі ўзнёслымі паэтычнымі радкамі мы накіраваліся ў вёску Опса Браслаўскага раёна на «Восеньскі баль». На яго пастаўчан запрасілі кіраўнікі і ўдзельнікі народнага літаратурнага аб’яднання «Ветразь надзеі». Ва ўпрыгожаным Доме культуры нас цёпла сустрэлі яго гаспадыні — Анастасія Трашчынская і Люцыя Ролік. За кубачкам кавы з прысмакамі пазнаёмілі з творчасцю браслаўскіх аўтараў, у якіх сапраўды ёсць чаму павучыцца. Выступалі і мы. Кранальна прадэкламавала свае вершы Жанна Мышко, ускалыхнула эмоцыі прысутных Вольга Лісіцкая, чытала ўласныя паэтычныя радкі і я.
Адчувалася, што мы добра разумеем адно аднаго, таму час праляцеў вельмі хутка. Мерапрыемства паказала, што сябраваць — гэта так добра! Спадзяёмся, што будуць і наступныя творчыя сустрэчы. Не толькі з браслаўчанамі, але і ў калектывах на Пастаўшчыне. Прынамсі, мы марым пра гэта. А мары здзяйсняюцца!
Марына Кавалёнак, кіраўнік аматарскага літаб’яднання «Світанак»
Фота даслала Марына Кавалёнак
