Неяк прачнуўся ад шолаху за акном. Не, гэта быў не дождж — прыляцела сінічка, якая нібыта папярэджвала, што нядрэнна было б падсыпаць корму ў прымацаваную ля падаконніка кармушку. Нягледзячы на тое, што жывём на пятым паверсе, сёлета да нас штодзень сталі прылятаць шматлікія дробныя птушачкі.
Як вядома, у вырай адлятаюць не ўсе прадстаўнікі гэтага крылатага царства. Даволі шмат іх застаецца тут зімаваць. І, зразумела, знайсці корм у халодную пару года, калі зямля скавана марозам і ўсё навокал засыпана снегам, складана.
Паглядзеўшы ў інтэрнэце відэа, змайстравалі з унукам «сталоўку» для птушак. Насыпаем туды кожны дзень проса, сырых семак і назіраем, як ласуюцца ім птушачкі, падлятаюць па чарзе, моцна чырыкаюць. Мой унук Росцік вельмі любіць назіраць за гэтым працэсам. Раней мы з ім рэгулярна хадзілі падкормліваць вераб’ёў і сінічак да першай школы — там шмат розных кармушак змайстравана і развешана навучэнцамі.
@www.postawy.by Столовая для птичек открыта))) #postavykr #поставы #зима #птицы #природа ♬ оригинальный звук — Elena
Заўважылі, што сінічкі быццам бы больш дружныя, яны цярпліва сядзяць і чакаюць сваёй чаргі, пакуль сілкуюцца іх сародзічы. А вось верабейчыкі любяць пасваволіць ды прагнаць іншых са «сталоўкі». Акрамя проса, ахвотна дзяўбуць птушкі падсушаны хлеб і кавалачкі несалёнага сала. Мы з унукам пачыталі парады арнітолагаў і ведаем, чым можна падкормліваць птушак, а што ім катэгарычна забаронена.
На маю думку, не так і складана кожнаму з нас паклапаціцца пра прыроду. У інтэрнэце вельмі шмат ідэй па вырабе кармушак для птушак. Давайце дапаможам ім перазімаваць!
Уладзімір Шык
