28 снежня ў рэспубліканскім цэнтры падрыхтоўкі па шахматах і шашках у Мінску прайшоў рэспубліканскі калядны турнір сярод юнакоў і дзяўчат да 16 гадоў па бліцы. У ім прынялі ўдзел 92 кваліфікаваныя спартсмены, якія згулялі 9 агульных тураў. У ліку ўдзельнікаў была і дзевяцікласніца пастаўскай СШ №2 імя Н. М. Асяненкі, выхаванка шахматнага клуба «Віцязь» пры раённым цэнтры дзяцей і моладзі Ева Іванова (трэнер — Анатолій Салацінскі).
Нашу зямлячку — чатырохразовую чэмпіёнку Віцебскай вобласці — чакала нялёгкая барацьба, бо сярод яе сапернікаў былі 2 кандыдаты ў майстры спорту і 6 спартсменаў з першым разрадам. Аднак Ева не разгубілася і аказала ім годнае супраціўленне, набраўшы 5 ачкоў. У выніковай табліцы яна апярэдзіла 17 саперніц і ва ўзроставай катэгорыі сярод дзяўчат да 14 гадоў заняла 2-е месца, саступіўшы толькі дзеючай чэмпіёнцы Беларусі.
Віншуем Еву Іванову з годным вынікам і жадаем ёй у найбліжэйшым будучым заваяваць званне чэмпіёнкі Беларусі.
Фота даслала Таццяна Іванова
