Сёлетняй восенню на Пастаўскім ільнозаводзе ўвялі ў эксплуатацыю лінію па выпуску катанізаванага валакна. Зроблена гэта з мэтай паглыблення перапрацоўкі.
З дырэктарам прадпрыемства Алёнай Юрынёнак ідзём у цэх. Яна бярэ ў рукі перапрацаванае валакно, і мне яно нагадвае бавоўну: мяккае, лёгка скубецца. Для загрузкі лініі выкарыстоўваецца кароткае валакно. Пасля спецыяльнай апрацоўкі з яго атрымліваецца катанін. Ён запатрабаваны на знешнім і ўнутраным рынках.
Ідэя закупкі новай лініі належыць дырэктару. Але, як яна сама сцвярджае, без падтрымкі райвыканкама, асабіста яго старшыні Сяргея Чэпіка, ажыццявіць задуманае было б вельмі складана.
— Грошы на закупку лініі выдзеліў аблвыканкам, — расказвала Алёна Дзмітрыеўна. — Сіламі будаўнікоў завода зрабілі рамонт у памяшканні, дзе пазней устанавілі абсталяванне, пастаўленае з Кітая. Працуе лінія ў тры змены. Адказны за працэс — майстар Андрэй Хадакоўскі.
Калі б ні гутарыла з Алёнай Юрынёнак, заўсёды захапляюся яе наватарствам, мэтанакіраванасцю, гаспадарлівасцю. З яе прыходам сітуацыя на заводзе карэнным чынам змянілася ў лепшы бок. Прадпрыемства не стаіць на месцы. Тут працуюць над тэхнічным пераабсталяваннем, укараняюць новыя тэхналогіі і паглыбляюць перапрацоўку льну. Усё гэта садзейнічае ўмацаванню эканамічнага стану прадпрыемства, росту заработнай платы.
Сёлета, нягледзячы на вельмі складаныя ўмовы надвор’я падчас росту даўгунцу, яго ўборкі, завод нарыхтаваў амаль 7 000 тон льнотрасты. Поўнасцю забяспечыў сябе неабходным аб’ёмам для далейшай перапрацоўкі. Сярэдняя ўраджайнасць трасты — 36 цэнтнераў з гектара, што на 4 цэнтнеры вышэй, чым у мінулым годзе. Сярэдні нумар — 0,99. Гэтага дасягнуць удалося дзякуючы таму, што на прадпрыемстве прымяняюцца прэвентыўныя меры, накіраваныя на мінімізацыю негатыўнага ўздзеяння прыродных фактараў.
Анна Анішкевіч
