Сёння сваё прафесійнае свята адзначаюць работнікі сацыяльнай абароны. У гэтай сферы працуюць не проста прафесіяналы, а людзі міласэрныя, здольныя спагадаць. Пад іх апекай знаходзяцца пенсіянеры, мнагадзетныя сем’і, адзінокія, сіроты, інваліды.
У нашым раёне сістэму сацыяльнай абароны прадстаўляюць упраўленне па працы, занятасці і сацыяльнай абароне райвыканкама і тэрытарыяльны цэнтр сацыяльнага абслугоўвання насельніцтва. Работа ва ўпраўленні, магчыма, непрыкметная, але важная і значная. Упраўленне забяспечвае рэалізацыю дзяржаўнай палітыкі ў сацыяльна-працоўнай сферы, сацыяльную падтрымку, садзейнічае занятасці насельніцтва, дэмаграфічнай бяспецы на тэрыторыі раёна.
Карыстаюцца попытам паслугі ТЦСАН. Найбольш запатрабаваная — аказанне сацыяльнай дапамогі дома сацыяльнымі работнікамі. У Пастаўскім тэрытарыяльным цэнтры працуюць 65 памочнікаў па доглядзе, 110 сацыяльных работнікаў і 13 сацработнікаў-сумяшчальнікаў, 9 нянь. На абслугоўвані ў іх знаходзяцца 1 053 чалавекі. Пашырылася практыка аказання непрацаздольным грамадзянам паслугі сядзелкі. Сёлета яе атрымалі 80 чалавек. 12 сем’ям, з якіх у 7 выхоўваюцца дзеці-інваліды, — паслугу няні. 7 чалавек скарысталіся паслугай дзённага нагляду.
— Ад таго, як працуе сацыяльная служба, залежыць лёс многіх людзей, — гаварыла загадчык аддзялення сацыяльнай дапамогі дома ТЦСАН Іна Вырвіч. — Няпростыя абавязкі ў сацыяльных работнікаў. Да кожнага падапечнага трэба знайсці падыход, даведацца, пра што баліць душа, у чым ён мае патрэбу, дапамагчы. Сацыяльны работнік як член сям’і для адзінокіх людзей. Гэта сябар, дарадца, памочнік, псіхолаг, медык, другая рука.
Догляд тых, хто не ў сілах абслугоўваць сябе сам і застаўся без апекі родных, забяспечваюць у аддзяленнях кругласутачнага знаходжання для грамадзян пажылога ўзросту і інвалідаў. Кіпіць жыццё ў аддзяленнях дзённага знаходжання, стацыянарных сацыяльных пунктах, дзе працуюць розныя гурткі, клубы па інтарэсах. Тут пажылыя зноў адчуваюць сябе актыўнымі, маладзеюць душой. Людзям з інваліднасцю інтэгравацца ў соцыум дапамагаюць у аддзяленні сацыяльнай рэабілітацыі, абілітацыі інвалідаў. Хапае спраў і ў валанцёраў.
Вялікая ўвага ў цэнтры ўдзяляецца паляпшэнню якасці і стварэнню бяспечных умоў пражывання для пажылых і інвалідаў. Для гэтага работнікі ТЦСАН абследуюць іх жыллё. Пры неабходнасці ўразлівым катэгорыям насельніцтва аказваюць матэрыяльную дапамогу.
— У кожнай прафесіі сваё прызначэнне: настаўнікі даюць веды, урачы лечаць, міліцыянеры забяспечваюць ахову грамадскага парадку і нашу бяспеку, — працягвала Іна Вырвіч. — Работнікі сацыяльнай службы часам спалучаюць у сабе ўсе гэтыя абавязкі: абараняюць, дапамагаюць, лечаць чалавечыя душы. Раўнадушны чалавек у нас не затрымліваецца. У Пастаўскім ТЦСАН працуюць тыя, хто ўмее спачуваць, прымаць на сябе чужыя праблемы, як свае. Дзякуй кожнаму за добрае сэрца, спагаду, уменне рабіць дабро на карысць іншых.
Анна Анішкевіч
