9 лютага на планеце адзначаўся Міжнародны дзень стаматолага. З гэтай нагоды ў многіх стаматалагічных клініках прайшлі бясплатныя кансультацыі. Урачы расказалі пацыентам пра неабходнасць рэгулярна даглядаць поласць рота, своечасова лячыць зубы і сачыць за іх чысцінёй з маленства, бо здаровыя малочныя зубы ў дзіцяці — залог яго прыгожай усмешкі ў дарослым узросце.
Нярэдка ў малых зубы, толькі прарэзаўшыся, пачынаюць чарнець і разбурацца.
— Гэта праяўленне так званага бутэлечнага карыесу, які ўзнікае на 4—6 верхніх зубах у прышыечнай вобласці, дзе ступень мінералізацыі эмалі самая нізкая, — кажа стаматолаг-тэрапеўт (загадчык стаматалагічнага аддзялення) паліклінікі Пастаўскай ЦРБ Аксана Герасімава. — Спачатку эмаль становіцца бялявай і шурпатай. Потым з’яўляюцца карычневыя плямы, а ў далейшым — карыёзныя поласці.
Па словах урача, найбольш частай прычынай «бутэлечнага» карыесу з’яўляюцца начныя кармленні, калі дзіця засынае з бутэлечкай. Адсюль і назва захворвання. Рэшткі салодкай сумесі застаюцца на эмалі, а гэта ідэальнае асяроддзе для развіцця патагеннай мікрафлоры. Да фактараў, якія правакуюць узнікненне карыесу, адносяцца таксама недастатковы догляд ротавай поласці ці, наогул, яго адсутнасць, зніжэнне імунітэту ў выніку перанесенай вострай рэспіраторнай або кішачнай інфекцыі, змяненне саставу сліны, генетычная схільнасць і няправільны рацыён, калі дзецям дазваляюць ужываць шмат салодкага і сокаў. Хваробатворныя бактэрыі могуць трапіць у рот малога і ад дарослага. Напрыклад, калі бацькі каштуюць ежу з дзіцячай лыжкі, аблізваюць пустышку.
— Каб пазбегнуць праблем, пачынаць чысціць зубкі дзіцяці неабходна з моманту з’яўлення першага зуба і рабіць гэта не радзей чым 2-3 разы на дзень, — працягвае Аксана Герасімава. — Адкарэкціруйце рацыён малога: абмяжуйце ўжыванне салодкага, мучнога і давайце цвёрдую ежу — яблыкі, моркву, агуркі і інш. Па-першае, дзецям падабаецца што-небудзь грызці, асабліва калі рэжуцца зубкі. Па-другое, такім чынам паверхня зуба ачышчаецца ад бактэрыяльнага налёту. Акрамя таго, некаторая гародніна (морква, агурок, сцябло сельдэрэю) і зяленіва (пятрушка) рэгулюе рН сліны, што стварае дадатковую абарону ад карыесу. Не аблізвайце соску ці лыжку малога, не перажоўвайце для яго ежу. Разам з вашай слінай перадаецца і бактэрыяльная флора поласці рота, з якой арганізм дзіцяці не заўсёды можа справіцца. Як мага хутчэй адвучыце дзіця ад бутэлечкі. Замяніце салодкія напіткі кіпячонай вадой.
Калі ў дзіцяці з’явіўся «бутэлечны» карыес, его неабходна лячыць, бо захворванне развіваецца вельмі хутка і ўжо к 4 гадам малы можа застацца без зубоў. А гэта пагражае дэфектамі маўлення, парушэннем прыкусу і, як вынік, змяненнем знешнасці. Таксама карыес можа прывесці да пашкоджання зачаткаў пастаянных зубоў.
Алена Шапавалава
