Чэмпіянат Беларусі па футболе
Крыўдная развязка
«Газавік» (Віцебск)–ФСК «Паставы» – 2:1
Суботнім матчам у абласным цэнтры з дзеючым віцэ-чэмпіёнам адкрылася гульнявая праграма 2-га тура. У складзе пастаўчан дэбютаваў вопытны варатар са сталіцы Уладзіслаў Галавенка. Спачатку матч праходзіў на роўных. А ў сярэдзіне тайма нашы займелі перавагу. На 27-й хвіліне пастаўчане маглі выйсці наперад, але крыху прамахнуліся. Затым галкіпер пастаўчан аддаў дакладную перадачу апорніку Аляксандру Звяругу, які вывераным пасам вывеў на ўдарную пазіцыю Крысціяна Дзеўгуця — 0:1. Гульня абвастрылася. На 38-й хвіліне мяч ад К. Дзеўгуця зрыкашэціў у непрыкрыты вугал — 1:1. У другой палове нашы згулялі яшчэ мацней. Сапернік зарабіў тры папярэджанні, зрываючы вострыя атакі пастаўчан.
Абедзве каманды выдалі вогненную канцоўку, каб перамагчы, але спартыўнае шчасце ўсміхнулася віцябчанам. На 82-й хвіліне яны арганізавалі контратаку — 2:1.
Крыўдна прайгралі сярэбранаму прызёру Галавенка, Маршын, Голубеў (к), Пучынскі (Богай), Камісарчук, Кундра (Кучараў), Звяруга, Цыўнель (Абалевіч), Дзеўгуць (Янушкевіч), Каралёнак, Чалей (Курыловіч).
У наступным туры пастаўчане 24 мая правядуць першы дамашні паядынак з сенненцамі.
Уладзімір Шык
