На Пастаўшчыне завяршылі ўборку азімага ячменю. Сёлета гэтая культура займала плошчу ў 2 316 гектараў. Першы важны экзамен бягучай уборачнай кампаніі хлебаробы раёна вытрымалі годна.
Традыцыйна наперадзе ідуць флагманы мясцовага аграпрамысловага комплексу, якія сваім прыкладам даказваюць, што нават у нашых кліматычных умовах можна атрымліваць рэкордныя намалоты. Сапраўдным лідарам уборачнай кампаніі на азімым ячмені стала ААТ «Хацілы-агра». Тут намалацілі рэкордныя 81,1 цэнтнера з гектара, што выклікае гонар за хацілаўскіх майстроў зямлі. Высокую планку трымаюць і ў ААТ «Навасёлкі-Лучай», дзе ўраджайнасць азімага ячменю — 69,1 цэнтнера з гектара.
Сярэдняя ўраджайнасць па раёне склала 35,7 цэнтнера з гектара, што амаль на 11 цэнтнераў перавышае мінулагодні вынік.
За кожнай лічбай — напружаная, самаадданая праца механізатараў, якія ад цямна да цямна працуюць у полі, агранамічнай службы, кіраўнікоў сельгаспрадпрыемстваў. Сёлетні важкі колас — гэта вынік прымянення навуковага падыходу, выкарыстання найноўшых тэхналогій і дакладнага разліку. Своечасовая і якасная сяўба ў добра падрыхтаваную глебу, правільна падабраны насенны матэрыял, у тэрмін праведзеная падкормка раслін, а таксама эфектыўная ахова ад шкоднікаў і хвароб — менавіта з гэтых важных складальнікаў і атрымаўся высокі ўраджай.
Завяршэнне ўборкі азімага ячменю — толькі пачатак вялікага жніва. Наперадзе ў аграрыяў Пастаўшчыны яшчэ шмат працы. Яны разумеюць: час не чакае, і кожная пагодлівая хвіліна — на вагу золата.
Пасля таго як апошнія гектары ячменю былі ўбраны, тэхніка аператыўна перадыслацыравалася на рапсавыя палі. Гэта культура займае 3 946 гектараў. Уборку азімага рапсу распачалі ў ААТ «Камайскі-агра» і на сельгаспрадпрыемстве «Дунілавічы-агра».
Анна Анішкевіч
