30 кастрычніка ў Нацыянальным акадэмічным Вялікім тэатры оперы і балета прайшла ўрачыстасць «Адзінства ў імя міру», прысвечаная 65-годдзю Беларускага фонду міру. Сярод удзельнікаў маштабнага мерапрыемства былі і прадстаўнікі нашага раёна. Для старшыні праўлення раённай арганізацыі Наталлі Субко гэта сустрэча стала яшчэ і нагодай для прыемнай нечаканасці.
Цырымонія сабрала больш за тысячу прадстаўнікоў міратворчага руху з усіх рэгіёнаў Беларусі і шэрага замежных дзяржаў. Сярод гасцей — дзяржаўныя і грамадскія дзеячы, прадстаўнікі кіраўніцтва ААН, дыпламатычных місій, аблвыканкамаў, рэлігійных канфесій Беларусі, навукі і культуры. Пастаўшчыну на святочнай сустрэчы прадстаўлялі старшыня праўлення раённай арганізацыі ГА «Беларускі фонд міру» Наталля Субко, члены праўлення арганізацыі Галіна Казлоўская і Аляксандр Іванькоў.
Віншаванні з нагоды юбілею гучалі ад прадстаўнікоў дзяржаўнай улады і грамадскіх арганізацый. Сярод ганаровых удзельнікаў — намеснік Старшыні Палаты прадстаўнікоў Нацыянальнага сходу Рэспублікі Беларусь Вадзім Іпатаў, старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Наталля Паўлючэнка, старшыня Беларускай партыі «Белая Русь» Вольга Чамаданава, старшыня праўлення Беларускага фонду Міру Максім Місько, Мітрапаліт Мінскі і Заслаўскі Веньямін, Патрыяршы Экзарх усяе Беларусі, і іншыя.
Сёння ў Беларускім фондзе міру больш за 230 тысяч членаў і звыш мільёна валанцёраў. Гэта людзі розных прафесій, якіх аб’ядноўвае імкненне да міру, незалежна ад нацыянальнасці, прафесійных інтарэсаў і дзяржаўных межаў. Арганізацыя таксама з’яўляецца адзіным кандыдатам ад Беларусі на атрыманне кансультатыўнага статусу назіральніка пры ААН.
Асаблівым момантам для пастаўчан стала ўзнагароджанне Наталлі Субко. За самаадданае служэнне справе міру, актыўную дабрачынную і гуманітарную дзейнасць, значны асабісты ўклад у рэалізацыю высакароднай місіі Беларускага фонду міру яна ўдастоена Ганаровай граматы. На працягу 9 гадоў Наталля Мечыславаўна была намеснікам старшыні праўлення раённай арганізацыі, а з гэтага года ўзначальвае яе. Узнагароду ёй уручыў біскуп Аляксандр Яшэўскі, старшыня Камісіі Божага культу і дысцыпліны сакрамантаў пры Канферэнцыі Каталіцкіх біскупаў Беларусі.
— Шчыра кажучы, гэта ўзнагарода стала для мяне поўнай нечаканасцю. Было вельмі прыемна і хвалююча атрымаць такую высокую ацэнку сваёй працы. Успрымаю яе не як асабістую адзнаку, а як прызнанне дзейнасці ўсёй нашай раённай арганізацыі, людзей, якія побач і дапамагаюць рэалізоўваць добрыя справы. Таксама выказваю шчырую ўдзячнасць старшыні абласнога праўлення Таццяне Уладзіміраўне Туманавай за падтрымку нашых ініцыятыў. Лічу, што працаваць дзеля міру, падтрымліваць тых, хто мае патрэбу ў дапамозе, і разам рабіць дабро — гэта вельмі важна, — падзялілася ўражаннямі Наталля Субко.
Крысціна Рубель
Фота даслала Наталля Субко
