З 27 па 30 кастрычніка ў Мінскім міжнародным выставачным цэнтры праходзіў ХХХ Беларускі энергетычны і экалагічны форум Energy Expo-2026, які сабраў больш за 200 кампаній і арганізацый з 9 краін свету. За чатыры дні пабываць на гэтым маштабным мерапрыемстве змаглі каля 38 тысяч чалавек. Сярод іх — навучэнцы інжынерных груп пастаўскіх СШ №1 і №2 імя Н. М. Асяненкі.
— На форум нас запрасілі па лініі Міністэрства адукацыі Рэспублікі Беларусь, — расказвала настаўнік фізікі СШ №2 імя Н. М. Асяненкі Таццяна Пракаповіч, якая суправаджала групу школьнікаў з Пастаў. — Ездзілі туды ў мінулы чацвер 10 вучняў 10-га і 11-га класаў нашай школы і 8 — першай гарадской. У праграме было наведванне міжнароднай спецыялізаванай выставы «Энергетыка. Экалогія. Энергазберажэнне. Электра». На ёй беларускія і замежныя кампаніі прадставілі свае распрацоўкі ў названых галінах. Спачатку для нас правялі экскурсію, а потым мы самі хадзілі па BELEXPO і разглядалі ўсё.
Па словах Таццяны Іванаўны, уразіў і сам выставачны цэнтр — шыкоўны будынак плошчай каля 10 000 м², і прадстаўленыя мадэлі розных агрэгатаў — усе аўтаматызаваныя, нашпігаваныя электронікай. Часам цяжка было зразумець, як яны зроблены і працуюць. Распрацоўкі выклікалі жывы інтарэс у вучняў. Старшакласнікі засталіся ўражаныя таксама прадстаўнікамі кампаній, якія расказвалі пра тэхнічныя навінкі і абмяркоўвалі іх паміж сабой. Яны сталі для школьнікаў прыкладам, на каго раўняцца і дзеля чаго варта вучыцца.
На выставе было шмат інтэрактыўных пляцовак для дзяцей, якія наведалі пастаўчане. Яны паўдзельнічалі ў конкурсах, паразгадвалі рэбусы, шарады і атрымалі невялікія прызы.
— Інжынерная група ў нашай школе працуе ўжо трэці год. І штогод мы ездзім на мерапрыемствы, звязаныя з профілем навучання. Звычайна запрашаюць на дзень адчыненых дзвярэй у БНТУ, з якім заключаны дагавор аб супрацоўніцтве, а таксама на «Кірмаш вакансій» у ПДУ імя Еўфрасінні Полацкай. Многія выпускнікі групы паступаюць у Беларускі нацыянальны тэхнічны ўніверсітэт. Самых лепшых хлопцаў я арыентую на энергетычны факультэт, які добра ведаю, бо там вучыўся мой сын. Зараз яго студэнтамі з’яўляюцца трое былых вучняў школы. Упэўненая, што наведванне выставы Energy Expo паспрыяе прафарыентацыі.
Таццяна Пракаповіч
Алена Шапавалава
Фота даслала Таццяна Пракаповіч
