З кожным днём у раёне павялічваецца колькасць убраных гектараў, засекі гаспадарак папаўняюцца тонамі збожжа, расце каманда тысячнікаў.
З розніцай у пяцьдзясят тон адзін за адным дасягнулі тысячнага намалоту камбайнеры ААТ «Навасёлкі-Лучай» Генадзій Анкудовіч, Віктар Рогаў і Яўгеній Грышчанка. Па традыцыі ўшанаваць лідараў жніва ў поле адправіўся старшыня райкама прафсаюза работнікаў АПК Васілій Катовіч.
Генадзій Анкудовіч убіраў пшаніцу за Дземяшамі. Выгрузіў збожжа з бункера і заехаў на чарговы круг. Работу перапынілі Васілій Катовіч і старшыня пярвічнай прафсаюзнай арганізацыі сельгаспрадпрыемства Уладзімір Чумакоў. Кожны з іх шчыра павіншаваў руплівага камбайнера, пажадаў новых высокіх намалотаў, уручыў грашовыя прэміі. Генадзій Пятровіч — вельмі сціплы чалавек. Не любіць гаварыць пра сябе. Таму, папрасіўшы прабачэння, заспяшаўся ў кабіну камбайна, маўляў, надвор’е радуе сонцам і трэба рупіцца.
За Рудзевічамі працавалі Віктар Рогаў і Яўгеній Грышчанка.
— Ураджай сёлета вырас добры, але ўборка даецца цяжка, — гаварыў Віктар. — У пачатку яе, бывала, выедзем у поле, па бункеру намалоцім — і дождж. Я кожны сезон на жніве, бачыў усякае, але такога дажджлівага лета не памятаю. На многіх участках і цяпер разагнацца немагчыма з-за пераўвільготненай глебы. Ды і ўраджайнасць не ўсюды аднолькавая. Летась з улікам кукурузы на маім рахунку было 3 600 тон. Як будзе сёлета, пакажа час.
Яўгенію Грышчанку на той момант да тысячы не хапала 6 тон. І ён збоку назіраў за тым, як віншаванні прымаў Віктар. Але ўжо пасля абеду начальнік навасёлкаўскага аддзялення Дзмітрый Лібоза паведаміў, што тысячнага намалоту дасягнуў і Яўгеній.
Вадзіцель СП «Дунілавічы-агра» Вячаслаў Дзіковіч у гаспадарцы працуе другі год. МАЗ, які збіраліся спісваць, ён дасканала адрамантаваў. І тысячу тон збожжа перавёз на ім у ліку першых.
— Прыемна бачыць, як стараюцца людзі! — гаварыў Васілій Катовіч. — Сёлетняе жніво надзвычай складанае. Таму хочацца асаблівым чынам падтрымаць перадавікоў. Упэўнены, іх будзе яшчэ не адзін дзясятак.
Анна Анішкевіч
