На мінулым тыдні на Пастаўшчыне пачалася масавая вакцынацыя насельніцтва супраць грыпу.
— У панядзелак ва УАЗ «Пастаўская ЦРБ» паступіла трывалентная інактываваная вакцына «Гриппол плюс» вытворчасці Расійскай Федэрацыі, якая ўключае ў сябе два падтыпы віруса грыпу А — H1N1, H3N2 — і вірус грыпу В у адной з дзвюх яго ліній (Вікторыя). І ўжо з аўторка мы пачалі рабіць прышчэпкі, — расказвала загадчык аддзялення ўрачоў агульнай практыкі паліклінікі цэнтральнай раённай бальніцы Анастасія Танана. — У першую чаргу прышчэпліваем медыцынскіх работнікаў і тых жыхароў горада і раёна, якія загадзя запісваліся на вакцынацыю. Зрабіць прышчэпку могуць і іншыя. Працэдура праводзіцца ў кабінеце №47 паліклінікі і ва ўсіх амбулаторна-паліклінічных структурных падраздзяленнях нашай установы аховы здароўя ў гадзіны іх работы.
Па словах Анастасіі Алегаўны, перад вакцынацыяй неабходна наведаць урача агульнай практыкі. Ён ацэніць стан здароўя і дасць накіраванне на прышчэпку. Асобам, якім цяжка перамяшчацца, для вырашэння пытання аб вакцынацыі трэба патэлефанаваць у рэгістратуру ЦРБ па нумары 2-11-57 і зрабіць заяўку. Па заяўках будзе ажыццяўляцца і выязная вакцынацыя на прадпрыемствы і ва ўстановы раёна.
Разам з «Грипполом плюс» у цэнтральную раённую бальніцу паступілі таксама 40 доз вакцыны «Конвасел» ад COVID-19. Таму можна прышчапіцца і ад гэтага небяспечнага віруса. Абедзве вакцыны бясплатныя. А ў хуткім часе павінна паступіць яшчэ і платная вакцына ад грыпу французскай вытворчасці. Калі яе даставяць у ЦРБ, будзе паведамлена дадаткова.
Каму ў першую чаргу неабходна рабіць прышчэпку:
- дзецям ва ўзросце ад 6 месяцаў да 3 гадоў;
- дзецям ва ўзросце ад 3 гадоў і дарослым з хранічнымі захворваннямі;
- асобам з імунасупрэсіяй (прыгняценнем імунітэту);
- асобам старэйшым за 65 гадоў;
- цяжарным жанчынам;
- медыцынскім і фармацэўтычным работнікам;
- дзецям і дарослым, якія знаходзяцца ва ўстановах з кругласутачным рэжымам;
- работнікам службы жыллёва-камунальнай гаспадаркі, энергазабеспячэння і сувязі.
Алена Шапавалава
