14 вакалістаў і 3 калектывы з розных куткоў Віцебшчыны сабраў 5 красавіка на сцэне Пастаўскага раённага Дома культуры занальны адборачны тур ХХХІІ абласнога конкурсу патрыятычнай песні «Песні юнацтва нашых бацькоў».
Пазмагацца за пуцёўку ў фінал да нас прыехалі прадстаўнікі Браслаўскага, Докшыцкага, Міёрскага, Расонскага, Ушацкага, Шаркаўшчынскага і Полацкага раёнаў, а таксама Наваполацка. Перад пачаткам музычнага спаборніцтва іх і ўсіх прысутных у зале вітаў намеснік старшыні райвыканкама Станіслаў Чымбург. Ён заўважыў, што сёлетні адбор невыпадкова праходзіць у Паставах: горад з’яўляецца культурнай сталіцай Беларусі, і ў яго жыхароў ёсць цудоўная магчымасць пачуць найлепшыя галасы краю. Станіслаў Уладзіміравіч пажадаў удзельнікам удалых выступленняў і каб запаліліся новыя яркія зоркі.
Абласны конкурс патрыятычнай песні з’яўляецца своеасаблівым мастком праз дзесяцігоддзі, які аб’ядноўвае пакаленні. Штогод маладыя артысты бяруць у рукі мікрафон, каб сказаць: «Мы памятаем і любім песні юнацтва нашых бацькоў». А сёлета вакальны батл набыў асаблівую глыбіню, бо праходзіць пад знакам Года беларускай жанчыны. І гэта знайшло адлюстраванне ў яго тэматыцы. Першая песня, якую выконвалі ўдзельнікі (усяго яны рыхтавалі па дзве музычныя кампазіцыі), была прысвячэннем жанчыне, прызнаннем у любові тым, хто дорыць жыццё, клапоціцца пра сямейны ачаг і напаўняе свет пяшчотай і дабрынёй.
Крануць сэрцы слухачоў і ўразіць журы пад старшынствам салісткі Віцебскай абласной філармоніі Алены Паўлянковай змаглі многія канкурсанты. Хто з іх трапіць у фінал, стане вядома пазней, калі пройдуць усе адборачныя туры.
Больше фото в группах в ОК и ВК
Алена Шапавалава
Фото Натальи Налей
