У мінулыя гады камбайнеры і механізатары ААТ «Хацілы-агра» на адвозцы збожжа літаральна з першага тыдня жніва ўпэўнена адкрывалі рахунак тысячнікаў у раёне. Сёлета капрызы надвор’я паўплывалі на ўраджайнасць збожжавых культур: яна крыху ніжэйшая за мінулагоднюю. Сельгаспрадпрыемства спецыялізуецца на вырошчванні элітнага насення. А гэта патрабуе ад калектыву не проста высокіх тэмпаў работы, а філіграннай дакладнасці і строгага выканання тэхналогій. Менавіта высокі статус насенняводчай гаспадаркі і дыктаваў адмысловы графік жніва.
У адрозненне ад суседзяў, якія масава вывелі камбайны ў першыя ж дні кампаніі, у «Хацілах-агра» жніво пачалі пазней: чакалі поўнага выспявання зерня. Гэта і прытармазіла атрыманне тысячных намалотаў. Першымі іх дасягнулі сапраўдныя майстры нівы — Мікалай Чашун, Аляксей Мароз, Валерый Ярашэвіч і Арцём Чашун. За іх плячыма не адно жніво, кожны з іх ведае цану хлеба, што сыплецца ў бункер.
У ліку механізатараў, якія першымі перавезлі па 1 000 тон збожжа, — Уладзімір Іваноў, Ян Янін, Мечыслаў Яморскі, Міхаіл Машара, Уладзімір Ярашэвіч.
Віншаванні перадавікі прымалі традыцыйна падчас абеду. Дыпломы, грашовыя прэміі ім уручылі намеснік начальніка ўпраўлення па сельскай гаспадарцы райвыканкама Таццяна Адрэева, старшыня райкама прафсаюза работнікаў АПК Васілій Катовіч і дырэктар ААТ «Хацілы-агра» Вячаслаў Крыштафовіч. Падзякавала маладым лідарам за працу і ўручыла ім узнагароды другі сакратар райкама БРСМ Анастасія Зайкоўская.
Жніво ў ААТ «Хацілы-агра» выйшла на фінішную прамую. Але 1 000 тон збожжа павінна быць і на рахунку камбайнераў Міхаіла Субача, Уладзіміра Банькоўскага, Андрэя Валка, Ільі Бароўкі.
Анна Анішкевіч
