Даверце свае просьбы Святому Юду Тадэвушу
Дарагія браты і сёстры, вернікі, жыхары Пастаўшчыны і госці! Парафіяне касцёла Святога Юды Тадэвуша ў вёсцы Лучай і я, яго пробашч, шчыра запрашаем вас да нас у суботу, 24 кастрычніка, на 12 гадзін, каб раздзяліць радасць супольнай малітвы падчас нашага галоўнага парафіяльнага свята ў гонар Святога Юды Тадэвуша.
Гэта адзін з дванаццаці апосталаў Езуса Хрыста. У хрысціянскай традыцыі ён карыстаецца асаблівай пашанай як заступнік у самых складаных, заблытаных і, здавалася б, безнадзейных жыццёвых сітуацыях. Калі чалавечыя сілы на зыходзе, а надзея пачынае згасаць, вернікі звяртаюцца менавіта да Юды Тадэвуша, просячы аб дапамозе ў хваробах, сямейных праблемах, фінансавых цяжкасцях і пры душэўным неспакоі. Наш лучайскі касцёл, які з гонарам носіць імя гэтага вялікага святога, ужо шмат гадоў з’яўляецца месцам, дзе здзяйсняюцца цуды па веры людзей.
Галоўная асаблівасць фэсту — адмысловае Набажэнства, падчас якога зачытваюцца асабістыя просьбы да Святога Юды Тадэвуша і падзякі яму. Кожны з вас мае ўнікальную магчымасць прынесці да алтара свае самыя патаемныя перажыванні, боль, трывогі або, наадварот, выказаць шчырую ўдзячнасць за атрыманую ласку. Вы можаце загадзя напісаць свае інтэнцыі (лісты з просьбамі) і пакінуць іх у касцёле перад пачаткам Набажэнства. Верым, што ніводнае слова, сказанае з глыбокай верай, не застанецца непачутым.
Падчас фэсту ў вас будзе магчымасць прыступіць да сакраманту споведзі — ачысціць душу і напоўніць сэрца Божай ласкай. Гэта таксама цудоўная нагода памаліцца за здароўе бацькоў, шчасце дзяцей, мір у нашых сем’ях і на беларускай зямлі. А яшчэ парафіяльны фэст — не проста рэлігійная ўрачыстасць, а вялікае свята еднасці, якое аб’ядноўвае розныя пакаленні.
Адкрыйце свае сэрцы для Божага благаслаўлення праз заступніцтва Святога Юды Тадэвуша!
Ксёндз Яўген Міхайлаў, пробашч лучайскага касцёла
